Daund News – काही महिन्यांपूर्वी पाणीटंचाईच्या छायेत असलेला वरवंड येथील ऐतिहासिक व्हिक्टोरिया तलाव आता परिसरातील शेतीसाठी मोठा आधार ठरत आहे. चांगल्या पावसामुळे तलावात समाधानकारक पाणीसाठा निर्माण झाल्याने दौंड तालुक्यातील अनेक गावांतील शेतकऱ्यांना दिलासा मिळाला आहे. सुमारे ३१० एकर क्षेत्रात पसरलेला हा ऐतिहासिक तलाव ब्रिटिशकालीन काळात १८७६ मध्ये बांधण्यात आला होता. शेती, पिण्याचे पाणी आणि औद्योगिक गरजांसाठी महत्त्वाचा मानला जाणारा हा तलाव आजही दौंड व बारामती तालुक्यातील गावांसाठी जीवनवाहिनी ठरत आहे. तलावातील उपलब्ध पाण्यामुळे खरीप व उन्हाळी पिकांना मोठा फायदा होत असून ऊस, भाजीपाला, गहू तसेच चाऱ्याच्या पिकांना आधार मिळत आहे. कुरकुंभ एमआयडीसी, जानाई-शिरसाई योजना तसेच स्थानिक शेतीसाठी या तलावातून पाणीपुरवठा केला जातो. यंदा वेळेवर झालेल्या पावसामुळे तलावात चांगला साठा निर्माण झाल्याने शेतकऱ्यांनी समाधान व्यक्त केले आहे. “व्हिक्टोरिया तलावामुळे परिसरातील शेती जिवंत राहिली असून अनेक गावांचे अर्थकारण टिकून आहे,” अशी भावना ग्रामस्थांकडून व्यक्त करण्यात येत आहे. दरम्यान, तलावातील पाणीसाठा टिकवून ठेवण्यासाठी गाळ काढणे, जलसंधारण प्रकल्प राबविणे आणि पाण्याचा अपव्यय रोखणे गरजेचे असल्याचे मत नागरिकांनी व्यक्त केले. भविष्यातील पाणीटंचाई टाळण्यासाठी दीर्घकालीन नियोजन करण्याची मागणीही होत आहे. व्हिक्टोरिया तलावाचे महत्त्व ▪️ बांधकाम वर्ष – १८७६ ▪️ क्षेत्रफळ – सुमारे ३१० एकर ▪️ साठवण क्षमता – सुमारे २०० लक्ष घनफूट ▪️ दौंड व बारामती तालुक्यातील शेतीसाठी महत्त्वाचा आधार ▪️ कुरकुंभ एमआयडीसी व जानाई-शिरसाई योजनेसाठी पाणीपुरवठा ▪️ हजारो एकर शेतीला सिंचनाचा लाभ.
