Ajit Pawar tweets : राज्याचे उपमुख्यमंत्री अजित पवार यांचा विमान अपघातात मृत्यू झाल्याने महाराष्ट्र सुन्न झाला आहे. या दुर्देवी घटनेने देशभरात शोककळा पसरली आहे. अजित पवार यांची अकाली एक्सिट मनाला चटका लावणारी आहे. अजित पवार यांच्या जाण्याने राष्ट्रवादीच्या नेत्यांवर दुःखाचा डोंगर कोसळला आहे. तसेच पवार कुटुंबासाठी हा मोठा आघात आहे.

विमान अपघाताची घटना घडण्यापूर्वी अजित पवार यांनी शेटवचे ट्वीट केले होते हे समोर आले आहे. आज सकाळी ८ वाजून ५७ मिनिटांनी अजित पवार यांनी एक्सवरून ट्वीट करत महान स्वातंत्र्य सेनानी, पंजाब केसरी लाला लजपत राय यांना जयंतीनिमित्त अभिवादन केले.

“राष्ट्राच्या स्वातंत्र्यासाठी आपले सर्वस्व अर्पण करणारे, महान स्वातंत्र्य सेनानी, स्वराज्याचे उद्घोषक, ‘पंजाब केसरी’ लाला लाजपत राय जी यांना जयंतीनिमित्त विनम्र अभिवादन! त्यांची राष्ट्रनिष्ठा आपल्याला कायमच प्रेरणा देत राहील” असं ट्वीट त्यांनी केले होते.

आजचा दिवस महाराष्ट्राच्या राजकारणात अत्यंत दुर्देवी दिवस ठरला आहे. अजित पवार हे महाराष्ट्राच्या राजकारणातील एक प्रभावी नेते होते. त्यांना राजकारणातील दादा म्हटले जात होते. सर्वपक्षीय नेत्यांसोबत त्यांचे चांगले संबंध होते. पण आज झालेल्या विमान अपघातात क्षणात होत्याचं नव्हतं झालं.

जिल्हा परिषद निवडणुकांच्या प्रचार सभांच्या निमित्ताने अजित पवार मुंबईहून बारामती दौऱ्यावर निघाले होते. मात्र बारामतीत लँडिंग करताना विमानाचा भीषण अपघात झाला. हा अपघात इतका भीषण होता की संपूर्ण विमान अपघातात जळून खाक झाले. या अपघातात अजित पवार यांच्यासोबत पाच जणांचा दुर्देवी मृत्यू झाला आहे.

अपघात झाला त्यावेळी अजित पवार यांच्या पत्नी, राज्यसभा खासदार सुनेत्रा पवार, बहीण आणि लोकसभा खासदार सुप्रिया सुळे, तसेच दिग्गज नेते शरद पवार हे अर्थसंकल्पीय अधिवेशनाच्या निमित्ताने दिल्लीत होते. त्यांच्यासोबत पार्थ पवारही राजधानीत होते. अजित पवार यांच्या अपघाताची बातमी मिळताच सर्व जण बारामतीला रवाना झाले आहेत. तसेच राष्ट्रवादी काँग्रेस पक्षातील सर्वच नेते बारामतीकडे रवाना झाले आहेत.

हेही वाचा : Yugendra Pawar : अजित पवारांच्या निधनाची बातमी कळताच युगेंद्र पवारांना अश्रू अनावर ; पवार कुटुंबावर दुःखाचा डोंगर