DA Hike : दिवाळीच्या आधी केंद्र सरकारने सरकारी कर्मचाऱ्यांना मोठी भेट दिली आहे. केंद्रीय मंत्रिमंडळाच्या बैठकीत केंद्रीय कर्मचाऱ्यांच्या महागाई भत्त्यात (DA) ३ टक्के वाढ करण्यास मंजुरी देण्यात आली. त्यामुळे महागाई भत्ता ६० टक्क्यांवरून ६३ टक्के झाला आहे.

या निर्णयाचा फायदा केंद्र सरकारचे १.१६ कोटींपेक्षा जास्त कर्मचारी आणि पेन्शनधारकांना होणार आहे. ही वाढ १ जुलै २०२६पासून लागू करण्यात येणार आहे.

याआधी २ टक्के वाढ

यापूर्वी एप्रिलमध्ये केंद्र सरकारने DA आणि पेन्शनधारकांच्या महागाई राहत भत्त्यात (DR) २ टक्के वाढ केली होती. त्यानंतर DA ६० टक्के झाला होता. आता त्यात आणखी ३ टक्के वाढ करण्यात आली आहे.

वर्षातून दोनदा होतो बदल

केंद्र सरकारकडून महागाई भत्ता आणि महागाई राहत भत्त्यात साधारणपणे वर्षातून दोन वेळा बदल केला जातो. जानेवारी आणि जुलैपासून हा बदल लागू होतो. वाढत्या महागाईचा परिणाम कर्मचाऱ्यांच्या खर्चावर होऊ नये, हा त्यामागचा उद्देश आहे.

पगारात किती वाढ होणार?

समजा, एखाद्या कर्मचाऱ्याचे मूळ वेतन २९,२०० रुपये आहे. DA मध्ये ३ टक्के वाढ झाल्याने त्याला दरमहा ८७६ रुपये अधिक मिळतील. DA वाढल्याने वाहतूक भत्त्यातही वाढ होऊ शकते. मोठ्या शहरांमध्ये हा फायदा सुमारे १०८ रुपये असू शकतो. त्यामुळे एकूण मासिक फायदा सुमारे ९८४ रुपये होऊ शकतो.