Cyclone Arnab : बंगालच्या उपसागरात निर्माण झालेल्या ‘अर्नब’ चक्रीवादळामुळे आंध्र प्रदेश आणि ओडिशामध्ये सतर्कता वाढवण्यात आली आहे. हवामान विभागाच्या अंदाजानुसार, चक्रीवादळ २८ ऑक्टोबरच्या सकाळी आंध्र प्रदेशच्या किनारपट्टीवर बापटला आणि विशाखापट्टणमदरम्यान यनमजवळ धडकण्याची शक्यता आहे. यावेळी वाऱ्याचा वेग ताशी १२५ किलोमीटरपर्यंत, तर झोतांचा वेग १४० किलोमीटरपर्यंत पोहोचू शकतो.

चक्रीवादळाच्या पार्श्वभूमीवर साऊथ कोस्ट रेल्वेने २७ आणि २८ ऑक्टोबरच्या ५३ गाड्या रद्द केल्या आहेत. तटीय आंध्र प्रदेश आणि यनममध्ये मुसळधार पावसाचा अंदाज आहे. त्यामुळे सखल भागात पाणी साचण्याची आणि वाहतुकीवर परिणाम होण्याची शक्यता आहे.

आंध्र प्रदेशात प्रशासनाची तयारी –

मुख्यमंत्री एन. चंद्राबाबू नायडू यांनी अधिकाऱ्यांना नागरिकांना वेळेत सूचना देऊन सुरक्षित ठिकाणी हलवण्याचे निर्देश दिले आहेत. मदतकार्यासाठी २० जिल्ह्यांना २७ कोटी रुपये देण्यात आले आहेत. सुमारे ४,७११ गर्भवती महिलांना रुग्णालयात हलवण्याची तयारी करण्यात आली आहे. समुद्रात गेलेले मच्छीमारही सुरक्षित परतले आहेत.

आंध्र प्रदेशातील विविध भागांत एनडीआरएफची पथके तैनात करण्यात आली आहेत. यनममध्येही दोन पथके आहेत. नागरिकांसाठी १,७६३ निवारा केंद्रे तयार ठेवण्यात आली आहेत. पाण्याचे टँकर, अग्निशमन वाहने आणि बचाव साहित्य सज्ज ठेवण्यात आले आहे. काही भागांतील शाळा बंद करण्यात आल्या असून समुद्रकिनारी जाणे आणि मासेमारीवर बंदी घालण्यात आली आहे.

ओडिशातही सतर्कता –

ओडिशात मुसळधार पावसासह ताशी ८० किलोमीटर वेगाने वारे वाहण्याचा अंदाज आहे. त्यामुळे आठ रेल्वे गाड्या रद्द करण्यात आल्या असून दोन गाड्यांचा प्रवास मध्येच थांबवण्यात आला आहे. सहा जिल्ह्यांमध्ये २८ आणि २९ ऑक्टोबरला शाळा बंद राहतील. गंजाममध्ये २७ ऑक्टोबरला अंगणवाडी केंद्रेही बंद ठेवण्यात आली आहेत.

या राज्यांनाही पावसाचा इशारा –

पश्चिम बंगाल: २८ ते ३० ऑक्टोबरदरम्यान काही जिल्ह्यांत मुसळधार पावसाचा अंदाज आहे. दार्जिलिंगच्या डोंगराळ भागात भूस्खलनाचा धोका आहे.

छत्तीसगड: २८ आणि २९ ऑक्टोबरला मुसळधार ते अतिमुसळधार पावसाची शक्यता.

पूर्व उत्तर प्रदेश: २९ ऑक्टोबरला मुसळधार पावसाचा अंदाज.

अंदमान-निकोबार: खबरदारी म्हणून शाळा दोन दिवस बंद ठेवण्याचे आदेश देण्यात आले आहेत.

तेलंगणा आणि बिहारसह इतर राज्यांनाही सतर्क राहण्याच्या सूचना देण्यात आल्या आहेत. रेल्वेने मोठ्या स्थानकांवर मदत कक्ष आणि तिकीट परतावा केंद्रे सुरू केली आहेत. प्रवाशांनी स्थानकात जाण्यापूर्वी आपल्या गाडीची स्थिती तपासावी, असे आवाहन करण्यात आले आहे.