Cyber Crime Pune – शेअर मार्केट आणि ऑनलाइन गुंतवणुकीच्या नावाखाली पुण्यातील नागरिकांना गंडा घालणाऱ्या सायबर टोळ्यांचा नवा ट्रेंड समोर आला आहे. इंस्टाग्राम, फेसबुक आणि व्हॉट्सॲपवर जाहिराती देऊन विश्वास संपादन करत, बनावट कंपन्यांच्या नावाखाली फसवणुकीची तीन वेगवेगळी प्रकरणे उघडकीस आली आहेत. यातून जास्त परताव्याचे आमिष हाच सर्वांत मोठ्या धोक्याचा संकेत असल्याचे अधोरेखित झाले आहे. जडेजा ब्रदर्सच्या नावाखाली २१ लाख लुटले डेक्कन परिसरातील एका २५ वर्षीय आयटी कर्मचाऱ्याला इंस्टाग्रामवरील जाहिरातीतून जडेजा ब्रदर्स या फर्मची माहिती मिळाली. निधी पटेल नावाच्या महिलेने संपर्क साधून उच्च परताव्याचे आमिष दाखवले. सुरुवातीला काही रक्कम परत देऊन विश्वास जिंकला. यानंतर संबंधित तरुणाकडून वेळोवेळी २१ लाख ७१ हजार रुपये विविध खात्यांमध्ये जमा करून घेतले. मात्र, परतावा बंद झाल्यानंतर फसवणूक उघडकीस आली. ग्रो मोअरद्वारे ७ लाख ७० हजारांची फसवणूक याच पद्धतीने एका तरुणाला इंस्टाग्रामवर ग्रो मोअर या कंपनीची जाहिरात दिसली. उमा महेश्वरी नावाच्या महिलेने शेअर ट्रेडिंगमध्ये गुंतवणूक केल्यास मोठा नफा मिळेल, असे सांगितले. सुरुवातीला थोडा परतावा देऊन विश्वास निर्माण केला. त्यानंतर डिसेंबर २०२५ मध्ये विविध खात्यांमध्ये मिळून ७ लाख ७० हजार रुपये जमा करून घेतले. मात्र, त्यानंतर संपर्क तुटल्याने फसवणूक स्पष्ट झाली. सायबर क्राईम (संग्रहित छायाचित्र) व्हॉट्सॲप ग्रुप, फेक अॅपचा गळ घोरपडी परिसरातील एका महिलेच्या पतीला फेसबुकवरून शेअर मार्केट गुंतवणुकीची जाहिरात दिसली. त्यातून व्हॉट्सॲप ग्रुपमध्ये ॲड करून देविका जोशी व इतरांनी मार्गदर्शन सुरू केले. त्यानंतर जेन एईएक्स नावाचे अॅप डाउनलोड करून ट्रेडिंग खाते उघडण्यात आले. अॅपमध्ये खोटा नफा दाखवून विश्वास निर्माण करण्यात आला. वेगवेगळ्या बँक खात्यांमध्ये पैसे भरायला लावून एकूण ४ लाख ५५ हजार रुपये उकळले. आयपीओसाठी लाखो रुपये भरण्याचा दबाव आणल्यावर संशय आल्याने फसवणूक उघड झाली. सायबर गुन्हेगारांची कार्यपद्धती * सोशल मीडियावर आकर्षक जाहिराती * बनावट कंपन्यांची नावे व फेक रिव्ह्यू * सुरुवातीला कमी रकमेवर परतावा देऊन विश्वास जिंकणे * व्हॉट्सॲप ग्रुप व बनावट अॅपद्वारे नियंत्रण * मोठ्या गुंतवणुकीसाठी दबाव * मोठी गुंतवणूक केल्यानंतर संपर्क तोडणे सायबर पोलिसांचा इशारा अनोळखी गुंतवणूक योजनांवर विश्वास ठेवू नका, सोशल मीडियावरील जाहिराती तपासूनच निर्णय घ्या. कोणत्याही अॅप/लिंकवर वैयक्तिक माहिती देऊ नका आणि फसवणूक झाल्यास त्वरित 1930 हेल्पलाइन किंवा सायबर पोर्टलवर तक्रार करा, असे आवाहन सायबर पोलिसांनी केले आहे.
