Cyber Crime – नाशिकमधील हाॅटेलची खोली आरक्षित करण्याची बतावणी करुन सायबर चोरट्यांनी एका महिलेची सात लाख २३ हजारांची फसवणूक केली असून शिवाजीनगर पोलिसांनी सायबर चोरट्यांविरुद्ध गुन्हा दाखल केला. महिलेच्या फिर्यादीनुसार, तक्रारदार शिवाजीनगर भागात राहायला असून सायबर चोरट्यांनी महिलेच्या मोबाइलवर संपर्क साधला. एका नामांकित ऑनलाइन बुकिंग सुविधा देणाऱ्या संस्थेतून बोलत असल्याची बतावणी करत नाशिकमध्ये आरक्षित केलेल्या हाॅटेलमधील आरक्षणाची तारीख बदलतो, असे सांगितले. त्यानंतर चोरट्यांनी महिलेच्या मोबाइलवर व्हिडीओ काॅलिंग सुविधेचा वापर करुन संपर्क साधला.चोरट्यांनी मोबाइल, तसेच अन्य बाबींची माहिती घेतली. मोबाइल क्रमांक बँक खात्याला जोडण्यात आला होता. चोरट्यांनी मोबाइल क्रमांक हॅक करुन महिलेच्या बँक खात्यातून परस्पर सात लाख २३ हजार रुपये स्वत:च्या खात्यात हस्तांतरित केले. फसवणूक झाल्या्चे उघडकीस आल्यानंतर महिलेने पोलिसांकडे तक्रार दिली. गुन्हे शाखेचे पोलीस निरीक्षक अमर काळंगे तपास करत आहेत. कार्डच्या आमिषाने फसवणूक क्रेडिट कार्ड देण्याच्या आमिषाने सायबर चोरट्यांनी एकाची दोन लाख १६ हजार ३९३ रुपयांची फसवणूक केली असून एकाने हडपसर पोलीस ठाण्यात दिलेल्या फिर्यादीनुसार तक्रारदाराच्या मोबाइलवर सायबर चोरट्यांनी संपर्क साधला. सायबर चोरट्यांनी त्यांना एका नामांकित बँकेचे क्रेडीट कार्ड देण्याच्या आमिष दाखविले. चोरट्यांनी त्यांना एक लिंक उघडण्यास सांगितले. लिंक उघडल्यानंतर चोरट्यांनी त्यांच्या बँक खात्यातून दोन लाख १६ हजार रुपये लांबवले. परताव्याच्या आमिषाने फसवणूक गुंतवणुकीच्या आमिषाने सायबर चोरट्यांनी एकाची तीन लाख ६५ हजार रुपयांची फसवणूक केली आहे. लोणीकंद पोलिसांनी दाखल केलेल्या गु्न्ह्यानुसार सायबर चाेरट्यांनी तरुणाच्या मोबाइलवर एक लिंक पाठविली. गुंतवणुकीवर जादा परताव्याचे आमिष चोरट्यांनी दाखविले. लिंक उघडल्यावर चोरट्यांनी तीन लाख ६५ हजार रुपयांची फसवणूक केली.
