पुणे :- महाराष्ट्र क्रिकेट संघटनेच्या गहुंजे येथील स्टेडियमवर आज (बुधवार) इंग्लंड व नेदरलॅंड यांच्यात सामना होत आहे. तसे पाहायला गेले तर या दोन्ही संघांचे यंदाच्या एकदिवसीय सामन्यांच्या विश्‍वकरंडक क्रिकेट स्पर्धेतील आव्हन यापूर्वीच संपूष्टात आले असल्याने केवळ प्रतिष्ठा राखण्यासाठी हे दोन संघ खेळतील, त्यातही सध्याची इंग्लंडची सुमार कामगिरी पाहता नेदरलॅंड्‌सचेच पारडे जड राहणार आहे.

लक्षवेधी…

– बटलर, मलान, रुट, बेअरस्टो सपशेल अपयशी
– लिव्हिंगस्टोन, बेन स्टोक्‍स व कुरेनकडूनही निराशा
– फलंदाजीसह गोलंदाजीतही अपयश
– नेदरलॅंडने दक्षिण आफ्रिकेला हरवल्यामुळे चर्चेत
– सायब्रॅंड एंजलब्रेक्‍ट, विक्रमजीत, ओद्वोड यांचे सातत्य
– आर्यन दत्तकडून मोठ्या अपेक्षा

2019 साली इंग्लंडने ही स्पर्धा जिंकत पहिल्यांदाच विजेतेपद पटकावले होते. मात्र, यंदाच्या स्पर्धेत त्यांना सपशेल अपयश आल्यामुळे गुणतालिकेत ते अखेरच्या 10 व्या स्थानावर आहेत. आतापर्यंत यंदाच्या स्पर्धेच्या स्पर्धेत त्यांनी 7 सामने खेळताना केवळ 1 सामना जिंकला असून त्यांचे अवघे 2 गुण आहेत. नेदरलॅंड्‌सची परिस्थितीही काही भिन्न नसली तरीही त्यांनी यंदाच्या स्पर्धेत दाखवलेली जिद्द कमालीची कौतुक प्राप्त ठरली आहे.

इंग्लंडपेक्षा त्यांनी एक सामना जास्त जिंकला असून त्यांचे 7 सामन्यांत 2 विजय व 5 पराभवांसह 4 गुण झाले आहेत. त्यांचेही स्पर्धेतील आव्हान यापूर्वीच संपूष्टात आले असले तरीही त्यांनी इंग्लंडवरही मात केली तर आगामी काळातील स्पर्धांसाठी त्यांचे मनोबल वाढणार आहे.

इंग्लंडच्या संघात जागतिक दर्जाचे फलंदाज असूनही त्यांना सातत्याने पराभव स्वीकारावे लागले आहेत. हा सामना जिंकत थोडीफार प्रतिष्ठा जपण्याची त्यांना संधी आहे. या स्पर्धेत या सामन्यानंतर इंग्लंडची पुढील लढत पाकिस्तानशी होणार असून नेदरलॅंडची या पुढील लढत येत्या रविवारी भारताशी होणार आहे. भारत व नेदरलॅंड यांच्यातील हा सामना यंदाच्या स्पर्धेतील अखेरचा साखळी सामना आहे.