CRPF Jawan Death – कर्तव्यावर जात असल्याचे सांगून घराबाहेर पडलेल्या सीआरपीएफ जवानाचा अपघाती मृत्यू झाला. त्याची ओळख पटविण्यात तळेगाव दाभाडे पोलीस अपयशी ठरल्याने कुटुंबीयांवर दुःखाचा डोंगर कोसळल्याची धक्कादायक घटना समोर आली आहे. ही घटना २५ मार्च रोजी सोमाटणे फाटा परिसरात घडली. प्रशांत कदम (रा. तळेगाव दाभाडे) असे मृत जवानाचे नाव असून त्यांच्या कुटुंबीयांनी ते बेपत्ता असल्याची तक्रार त्याच पोलीस ठाण्यात दिली होती. प्रशांत कदम हे २५ मार्च रोजी गांधीनगर (गुजरात) येथे ड्युटीवर जाण्यासाठी घरातून निघाले होते. मात्र, लोणावळा परिसरातून ते परत तळेगावच्या दिशेने आले. सोमाटणे फाटा येथे रस्ता ओलांडत असताना अज्ञात वाहनाने त्यांना जोराची धडक दिली. या अपघातात ते गंभीर जखमी झाले होते. त्यांना तातडीने वायसीएम रुग्णालयात दाखल करण्यात आले; मात्र उपचारापूर्वीच त्यांचा मृत्यू झाला. या प्रकरणातील सर्वात गंभीर बाब म्हणजे, अपघातानंतर पोलिसांनी मृतदेहाची ‘अनोळखी’ अशी नोंद केली. याच दरम्यान, त्याच पोलीस ठाण्यात प्रशांत कदम बेपत्ता असल्याची तक्रारही नोंदविण्यात आली होती. तरीही पोलिसांकडून या दोन घटनांमध्ये साधी सांगडही घालण्यात आली नाही. दरम्यान, पाच दिवस उलटल्यानंतर मित्रांनी स्वतः शोधमोहीम राबवली असता संबंधित मृतदेह हा प्रशांत कदम यांचाच असल्याचे स्पष्ट झाले. तोपर्यंत कुटुंबीय अनिश्चिततेत दिवस काढत होते. या संपूर्ण प्रकारामुळे पोलीस यंत्रणेच्या कार्यपद्धतीवर गंभीर प्रश्न उपस्थित होत असून, एका कर्तव्यदक्ष जवानाच्या कुटुंबाला असह्य मानसिक त्रास सहन करावा लागल्याची भावना व्यक्त होत आहे. संबंधित प्रकरणाचा तपास तळेगाव दाभाडे पोलीस ठाणे करीत आहे.
