यशवंतनगर : शिरवडे (ता.कराड) गावाजवळील स्मशानभूमी परिसरात कृष्णा नदीच्या पात्रात मंगळवारी दुपारी मगरीचा वावर दिसल्याने स्थानिक मासेमारी करणाऱ्या लोकांमध्ये भीतीचे वातावरण आहे. यापूर्वी परिसरात बिबट्याच्या दर्शनाने ग्रामस्थ हैराण झाले असताना आता मगरीच्या दर्शनाने घबराटीत आणखी भर पडली आहे. प्रत्यक्षदर्शींनी दिलेल्या माहितीनुसार, मंगळवारी दुपारी १२.३० च्या सुमारास मासेमारीसाठी नदीकाठावर गेलेल्या काही स्थानिकांना नदीच्या पात्रात मगरीचा वावर दिसला. ही मगर सुमारे ७ ते ८ फूट लांबीची असावी, असे मासेमारांचे म्हणणे आहे. मगरीने कोणावरही हल्ला केला नसला तरी तिच्या उपस्थितीमुळे मासेमारी करणारे सावध झाले आणि त्यांनी तात्काळ गावकऱ्यांना याबाबत माहिती दिली. ‘आम्ही रोज नदीवर मासेमारीसाठी येतो. पण आज पहिल्यांदाच मगर दिसली. ती काठावर बसलेली होती, त्यामुळे आम्ही घाबरलो आणि तिथून पळालो,’ असे मासेमारी करणाऱ्या सुरज मुल्ला या युवकाने सांगितले. दरम्यान, शिरवडे परिसरातील ग्रामस्थांनी वन विभाग आणि स्थानिक प्रशासनाकडून तातडीने उपाययोजना करण्याची मागणी केली आहे. आधी बिबट्या, आता मगर; आम्ही कायम धास्तावलेलो आहोत. प्रशासनाने यावर कायमस्वरूपी तोडगा काढावा. संजय साळुंखे (शिरवडे)
