शिरूर : शिरूर शहर परिसरात वाढत्या गुन्हेगारीच्या घटनांनी नागरिकांच्या सुरक्षिततेचा प्रश्न ऐरणीवर आला असतानाच, पोलीस अधीक्षक संदीपसिंह गिल्ल यांनी या प्रकारांची गंभीर दखल घेत शिरूर पोलीस ठाण्यात विशेष अधिकाऱ्यांची नियुक्ती केली आहे. महिलेला पिस्तुलाचा धाक दाखवून मंगळसूत्र लुटण्याचा प्रयत्न, गोळीबाराच्या घटना, दुचाकी चोरी, मारामाऱ्या, अवैध धंद्यांबाबत निर्माण झालेल्या चिंतेच्या पार्श्वभूमीवर पोलिसांच्या या निर्णयाकडे महत्त्वपूर्ण पाऊल म्हणून पाहिले जात आहे. मात्र, नियुक्तीमुळे गुन्हेगारीला खरोखर लगाम बसणार का आणि अवैध धंद्यांचे समूळ उच्चाटन होणार का, हे आता येणारा काळच ठरवणार आहे.

शिरूर शहरातील भाजीबाजार परिसरात गुरुवारी (दि.१५) पहाटे साडेपाचच्या सुमारास सिंधू आबासाहेब सरोदे या महिला पाण्याची मोटार सुरू करण्यासाठी घराबाहेर आल्या असताना दुचाकीवरून आलेल्या दोघांपैकी एकाने त्यांच्या डोक्याला पिस्तूल लावून मंगळसूत्राची मागणी केली. महिलेने धाडस दाखवत आरडाओरडा केल्याने नागरिक मदतीसाठी धावले. चोरट्यांना पळ काढावा लागला. पळून जाताना हवेत गोळीबार केल्याची माहितीही काही प्रत्यक्षदर्शींनी दिली. याप्रकरणी शिरूर पोलिसांनी दोन आरोपींविरुद्ध गुन्हा दाखल केला आहे.

शनिवारी (दि.१७) शहरातील आनंद सोसायटी परिसरात गोळीबाराची दुसरी घटना घडल्याने नागरिकांच्या चिंतेत भर पडली. शहरात कायदा-सुव्यवस्थेचा प्रश्न निर्माण होत असल्याची भावना व्यक्त होत असतानाच पोलीस अधीक्षकांनी विशेष अधिकाऱ्यांची नियुक्ती केल्याने आता पोलीस यंत्रणा प्रत्यक्षात किती प्रभावीपणे काम करते, याकडे सर्वांचे लक्ष लागले आहे.

गिल्ल यांच्याकडून गुन्हे शाखेत खांदेपालट

पोलीस अधीक्षक संदीपसिंह गिल यांनी घेतलेल्या दखलीनंतर शिरूरमधील गुन्हेगारीविरोधात पोलिसांची मोहीम अधिक तीव्र होण्याची अपेक्षा व्यक्त केली जात आहे. शिरूर पोलीस ठाण्यातील गुन्हे शाखेमध्ये बदल केला असून दोन नवीन अधिकाऱ्यांची नियुक्ती केली आहे. काही कर्मचाऱ्यांची अदलाबदल केली आहे. त्यामुळे शिरूरमधील गुन्हेगारीला खरोखर लगाम बसणार की गुन्हेगारी आणि अवैध धंद्यांचे आव्हान कायम राहणार? याचे उत्तर आता पोलिसांच्या प्रत्यक्ष कारवाईतूनच मिळणार आहे.