Crime:  साडेसाती निवृत्तीच्या श्रद्धेने आलेल्या भाविक महिलेच्या गळ्यातील सोन्याचे दागिने शनी चौथऱ्यासमोरच चोरीला गेल्याची घटना शनी शिंगणापूर मंदिर येथे घडली. या प्रकरणी तक्रार नोंदवण्यासाठी संबंधित महिलेला पोलीस ठाण्यासमोर तब्बल चार तास थांबावे लागल्याने भाविकांत संताप व्यक्त होत आहे.

देहू येथील महेश गुराप्पा नंदयाल (वय ४३) हे कुटुंबासह रविवारी (दि. १२) शनिदर्शनासाठी शनीशिंगणापूर येथे आले होते. दर्शनासाठी शनी चौथऱ्यावर गेले असताना त्यांच्या आईच्या गळ्यातील सुमारे ३२ मण्यांची सोन्याची बोरमाळ अज्ञात चोरट्यांनी लंपास केली. दर्शनादरम्यान गर्दीचा फायदा घेत ही चोरी केल्याचे प्राथमिक तपासात समोर आले आहे.

घटनेनंतर संबंधित कुटुंबाने सीसीटीव्ही फुटेज तपासले असता दोन संशयित महिला दिसून आल्याचे सांगितले जाते. मात्र, याबाबत तत्काळ कारवाई न झाल्याचा आरोप भाविकांकडून करण्यात येत आहे. विशेष म्हणजे, तक्रार नोंदवण्यासाठी गेलेल्या महिलेलाच पोलिसांकडून उलट चौकशीचा सामना करावा लागल्याची माहिती पुढे आली आहे.

शनीशिंगणापूर येथे ‘चोरी होत नाही’ अशी ओळख असताना थेट चौथऱ्यासमोरच चोरीची घटना घडल्याने सुरक्षा व्यवस्थेवर प्रश्नचिन्ह उपस्थित झाले आहे. तसेच, पोलिसांच्या कामकाजावरही भाविकांनी नाराजी व्यक्त केली आहे. या प्रकरणी भारतीय न्याय संहिता २०२३ च्या कलम ३०३(२) अन्वये गुन्हा दाखल करण्यात आला असून पुढील तपास महिला पोलीस हवालदार शिंदे करीत आहेत.