नवी दिल्ली – चीनमध्ये कोरोना विषाणूने भयानक रूप धारण केले होते. येथील बहुतांशी लोकांना कोरोनाचा संसर्ग झाल्याचे समोर आले होते. दरम्यान, एका प्रसिद्ध चिनी शास्त्रज्ञाने एक मोठा खुलासा केला आहे. चीनमध्ये पुढील दोन ते तीन महिन्यांत कोरोनाच्या संसर्गात दुसरी वाढ होण्याची शक्यता कमी आहे, कारण 80 टक्के लोकांना संसर्ग होऊन गेला आहे. 21 जानेवारीपासून चीनमध्ये सुरू झालेल्या सुट्ट्यांमध्ये मोठ्या संख्येने लोक प्रवास करतील अशी शक्यता आहे, ज्यामुळे काही भागात संक्रमण वाढू शकते, असा अंदाज देखील वर्तवला जात आहे. मात्र, दुसऱ्या कोरोना लाटेची शक्यता कमीच आहे. शास्त्रज्ञ वू जुन्यो म्हणाले, नववर्षादरम्यान, चीनमधील शहरांतील लोक त्यांच्या नातेवाईकांना भेटण्यासाठी ग्रामीण भागात जातात. अशा परिस्थितीत ग्रामीण भागात संसर्गाचे प्रमाण जास्त असू शकते, कारण कोरोनाला रोखण्यासाठी फारच कमी व्यवस्था आहेत. दुसरीकडे, आणखी एका अधिकाऱ्याने सांगितले की, चीनमध्ये कोरोनाच्या गंभीर रुग्णांच्या संख्येने सर्वोच्च पातळी ओलांडून झाली आहे. 60 हजार लोकांचा मृत्यू झाला आहे चीनच्या अधिकृत आकडेवारीनुसार, 12 जानेवारीपर्यंत येथे 60 हजारांहून अधिक लोकांचा मृत्यू झाला आहे. अलीकडेच चीनने हा डेटा जागतिक आरोग्य संघटनेसोबत शेअर केला आहे. चीनने झिरो कोविड धोरण मागे घेण्याचे कारण कोरोनामुळे मृत्यूच्या संख्येत वाढ झाल्याचे सांगितले होते.
