Pune News : ‘आईला वाचवू शकलो नाही’; या वेदनेतून लेकाचं टोकाचं पाऊल; पुण्यात शोककळा
Pune News : या दुर्दैवी घटनेमुळे संपूर्ण परिसरात शोककळा पसरली असून माय-लेकांवर एकाच सरणावर अंत्यसंस्कार करण्यात आले.
Pune News : ‘स्वामी तिन्ही जगाचा, आईविना भिकारी’ या म्हणीचा प्रत्यय देणारी अत्यंत हृदयद्रावक घटना पुण्यात घडली आहे. रुग्णालयात उपचार सुरू असलेल्या आईच्या निधनाची बातमी कळताच २५ वर्षीय मुलाला हा धक्का सहन झाला नाही. काही तासांतच त्याने गळफास घेऊन जीवन संपवलं. या दुर्दैवी घटनेमुळे संपूर्ण परिसरात शोककळा पसरली असून माय-लेकांवर एकाच सरणावर अंत्यसंस्कार करण्यात आले.
पर्वती दर्शन परिसरात राहणाऱ्या मंदा दोडके (५०) आणि त्यांचा मुलगा साहिल दोडके (२५) अशी मृतांची नावे आहेत. मूळचे दांडेकर पूल परिसरातील असलेले दोडके कुटुंब झोपडपट्टी पुनर्वसन प्रकल्पामुळे काही दिवसांपूर्वी पर्वती दर्शन येथे भाड्याच्या घरात राहायला आले होते.
मंदा दोडके या वृद्धांची सेवा करून कुटुंबाला आर्थिक हातभार लावत होत्या. चार बहिणींनंतर जन्मलेला साहिल हा घरातील एकुलता एक मुलगा आणि कुटुंबाचा आधार होता. पहाटे दूध वितरणाचे काम करून तो दिवसभर लिफ्ट दुरुस्तीचे काम करत असे. कष्टाळू स्वभावाचा साहिल आपल्या आईवर जीवापाड प्रेम करत होता.
गुरुवारी पहाटे मंदा दोडके यांना अचानक अर्धांगवायूचा तीव्र झटका आला. साहिलने तातडीने त्यांना ससून रुग्णालयात दाखल केले. मात्र, उपचार सुरू असतानाच शनिवारी सकाळी त्यांचे निधन झाले. नेहमीप्रमाणे आईसाठी चहा घेऊन रुग्णालयात पोहोचलेल्या साहिलला डॉक्टरांनी ही दुःखद बातमी दिली.
आईला वाचवू शकलो नाही, या भावनिक धक्क्यातून साहिल थेट घरी परतला. घरात स्वतःला कोंडून घेत त्याने गळफास लावून आत्महत्या केली. काही वेळाने नातेवाईक आणि बहिणी घरी पोहोचल्या. वारंवार दरवाजा ठोठावूनही प्रतिसाद न मिळाल्याने त्यांनी आत डोकावून पाहिले असता साहिल गळफास घेतलेल्या अवस्थेत आढळला. त्याला तातडीने रुग्णालयात नेण्यात आले, मात्र डॉक्टरांनी त्याला मृत घोषित केले.
कष्ट करून कुटुंबाचा आधार बनलेला तरुण आणि त्याची आई अशा दोघांचाही काही तासांच्या अंतराने मृत्यू झाल्याने दोडके कुटुंबावर दुःखाचा डोंगर कोसळला आहे. नवी पेठेतील वैकुंठ स्मशानभूमीत माय-लेकांवर एकाच सरणावर अंत्यसंस्कार करण्यात आले. या अंत्ययात्रेदरम्यान उपस्थित अनेकांच्या डोळ्यांत अश्रू तरळले आणि संपूर्ण परिसर हळहळून गेला.
