नवी दिल्ली – सोमवारी पंतप्रधान नरेंद्र मोदी यांनी कोरोनाव्हायरस संसर्ग आजाराचा सामना करण्यासाठी सशस्त्र दलाच्या तयारीसंदर्भात चीफ ऑफ डिफेंस स्टाफ बिपिन रावत यांच्याशी चर्चा केली. या बैठकीनंतर बिपीन रावत म्हणाले की, सैन्य दलातून गेल्या दोन वर्षांत सेवानिवृत्त झालेले सर्व वैद्यकीय कर्मचारी त्यांच्या घराजवळ असलेल्या कोविड केंद्रांवर काम करतील. यासह कमांड, कॉर्प्स, डिव्हिजन आणि नेव्ही आणि एअरफोर्सच्या तत्सम मुख्यालयांमध्ये तैनात असलेले सर्व वैद्यकीय अधिकारी रुग्णालयांमध्ये तैनात असतील. तसेच डॉक्टरांना मदत करण्यासाठी रूग्णालयात मोठ्या संख्येने नर्सिंग कर्मचारी तैनात आहेत आणि सशस्त्र दलाच्या विविध आस्थापनांकडे उपलब्ध ऑक्सिजन सिलिंडर रुग्णालयांना देण्यात येतील. अशी माहिती देण्यात आली आहे. या व्यतिरिक्त, सशस्त्र सेना मोठ्या संख्येने वैद्यकीय आस्थापनांची तयारी करीत आहे, जेथे जेथे शक्य असेल तेथे सैन्याच्या वैद्यकीय सुविधा सर्वसामान्यांना उपलब्ध करुन देण्यात येतील. पंतप्रधान नरेंद्र मोदी यांनी रावत यांची भेट घेतली. त्याचबरोबर भारतीय हवाई दलाकडून देश-विदेशातून ऑक्सिजन व अन्य आवश्यक पदार्थांच्या वाहतुकीच्या तयारीचा आढावा घेतला.
