नवी दिल्ली: केंद्र सरकारने कोपरा अर्थात सुक्या खोबऱ्याच्या उत्पादक शेतकऱ्यांसाठी एक मोठी आणि दिलासादायक घोषणा केली आहे. पंतप्रधान नरेंद्र मोदी यांच्या अध्यक्षतेखालील आर्थिक व्यवहार विषयक कॅबिनेट समितीने (CCEA) 2026 च्या हंगामासाठी कोपराच्या किमान आधारभूत किमतीत (MSP) वाढ करण्यास नुकतीच मंजुरी दिली आहे. या निर्णयानुसार, मिलिंग कोपरासाठी 2026 च्या हंगामाकरिता 12,027 रुपये प्रति क्विंटल इतका एमएसपी निश्चित करण्यात आला आहे. ही किंमत मागील हंगामापेक्षा 445 रुपये प्रति क्विंटलने अधिक असून, टक्केवारीत पाहिल्यास यात 3.84 टक्क्यांची वाढ झाली आहे. त्याचप्रमाणे, बॉल कोपरासाठी 12,500 रुपये प्रति क्विंटल एमएसपी ठरवण्यात आला आहे. हा दर मागील हंगामातील एमएसपीपेक्षा 400 रुपये प्रति क्विंटलने जास्त आहे, ज्यामुळे यात 3.31 टक्क्यांची वाढ झाली आहे. या दरवाढीचा थेट फायदा नारळ पिकवणाऱ्या शेतकऱ्यांना होणार आहे. केंद्र सरकारने एका निवेदनात स्पष्ट केले आहे की, जास्त एमएसपी मिळाल्याने शेतकऱ्यांना चांगला नफा तर मिळेलच, पण त्याचबरोबर त्यांना देशांतर्गत आणि आंतरराष्ट्रीय स्तरावर वाढणारी मागणी पूर्ण करण्यासाठी कोपराचे उत्पादन वाढवण्याचे प्रोत्साहनही मिळेल. नॅशनल एग्रीकल्चरल कोऑपरेटिव मार्केटिंग फेडरेशन ऑफ इंडिया लिमिटेड (NAFED) आणि नॅशनल कोऑपरेटिव्ह कंज्यूमर्स फेडरेशन (NCCF) या संस्था ‘प्राइस सपोर्ट स्कीम’ (PSS) अंतर्गत कोपरा खरेदीसाठी केंद्रीय नोडल एजन्सी म्हणून काम करतील. विशेष म्हणजे, गेल्या बारा वर्षांच्या कालावधीत कोपराच्या एमएसपीमध्ये मोठी वाढ झाली आहे. 2014 च्या मार्केटिंग हंगामात मिलिंग कोपरा आणि बॉल कोपरासाठी एमएसपी अनुक्रमे 5,250 रुपये आणि 5,500 रुपये प्रति क्विंटल होता. तो आता 2026 च्या हंगामासाठी अनुक्रमे 12,027 रुपये आणि 12,500 रुपये प्रति क्विंटल इतका झाला आहे. याचाच अर्थ, या काळात मिलिंग कोपराच्या एमएसपीमध्ये सुमारे 129 टक्के, तर बॉल कोपराच्या एमएसपीमध्ये सुमारे 127 टक्के इतकी वाढ झाली आहे.
