Sunetra Pawar : राष्ट्रवादी काँग्रेस पक्षाने 29 एप्रिल रोजी केंद्रीय निवडणूक आयोगाकडे सादर केलेल्या राष्ट्रीय कार्यकारिणीच्या यादीमुळे पक्षातील आर्थिक व्यवहारांवरील नियंत्रणाबाबत नव्या चर्चा सुरू झाल्या आहेत. या यादीनुसार पक्षाच्या आर्थिक अधिकारांची सूत्रे पवार कुटुंबीयांकडे केंद्रीत झाल्याचे चित्र दिसत आहे. खरंतर गेल्या काही दिवसांपासून राष्ट्रवादी काँग्रेस पक्षामध्ये अंतर्गत कलहाची जोरदार चर्चा राजकीय वर्तुळात आहे. अशातच पक्षाच्या आर्थिक व्यवहारांसंबधी समोर आलेल्या माहितीमुळे चर्चांना उधाण आले आहे. Sunetra Pawar : राष्ट्रवादीच्या आर्थिक व्यवहारांचं नियंत्रण ‘पवार’ कुटुंबीयांच्या हाती; प्रफुल्ल पटेल यांना मोठा धक्का? राजकीय खेळीची चर्चा या यादीमध्ये उपमुख्यमंत्री सुनेत्रा पवार यांची राष्ट्रीय अध्यक्ष म्हणून नियुक्ती करण्यात आली आहे. तसेच त्यांच्या दोन्ही मुलांनाही महत्त्वाच्या जबाबदाऱ्या देण्यात आल्या आहेत. पार्थ पवार हे राज्यसभा खासदार असून, त्यांच्याकडे राष्ट्रीय महासचिव पदासोबत पक्ष समन्वयाची जबाबदारी सोपवण्यात आली आहे, तर जय पवार यांच्याकडे राष्ट्रीय सचिव, राष्ट्रीय शिस्तपालन समिती अध्यक्ष आणि खजिनदाराची जबाबदारी सोपवण्यात आली आहे. (Sunetra Pawar) याशिवाय शिवाजीराव गर्जे यांच्याकडे लेखापरीक्षण आणि हिशोबाची जबाबदारी कायम ठेवण्यात आली आहे. मात्र, आर्थिक व्यवहारांचे प्रत्यक्ष नियंत्रण जय पवार यांच्याकडे असल्याचे या नियुक्त्यांवरून स्पष्ट होत असल्याची चर्चा राजकीय वर्तुळात सुरू आहे. दरम्यान, या राष्ट्रीय कार्यकारिणीच्या यादीत तांत्रिक त्रुटी असल्याचे स्पष्टीकरण सुनेत्रा पवार यांनी दिले होते. मात्र, दोन दिवस उलटल्यानंतरही सुधारित यादी जाहीर करण्यात आलेली नसल्याने 29 एप्रिलचीच यादी अधिकृत मानली जात आहे का, असा सवाल या निमित्ताने उपस्थित केला जात आहे. पक्षाच्या आर्थिक व्यवहारांबाबतही या बदलांना विशेष महत्त्व प्राप्त झाले आहे. राष्ट्रवादी काँग्रेसच्या अधिकृत बँक व्यवहारांसाठी तीन पदाधिकाऱ्यांना अधिकार असतात. यापूर्वी हे अधिकार अजित पवार, प्रफुल्ल पटेल आणि वाय. पी. त्रिवेदी यांच्याकडे होते. त्यांच्या स्वाक्षरीनंतरच पक्षाचे आर्थिक व्यवहार पूर्ण होत होते. मात्र, नव्या यादीमध्ये प्रफुल्ल पटेल आणि वाय. पी. त्रिवेदी यांचा राष्ट्रीय पदाधिकाऱ्यांमध्ये समावेश करण्यात आलेला नाही. त्यामुळे पक्षाच्या आर्थिक व्यवहारांवरील अधिकार आता राष्ट्रीय अध्यक्ष म्हणून सुनेत्रा पवार, राष्ट्रीय महासचिव म्हणून पार्थ पवार आणि खजिनदार म्हणून जय पवार या तिघांकडे केंद्रीत झाल्याचे स्पष्ट होत आहे. त्यामुळे राष्ट्रवादी काँग्रेसच्या आर्थिक निर्णयप्रक्रियेवर पवार कुटुंबाचे वर्चस्व वाढल्याची चर्चा रंगू लागली आहे. आगामी काळात मोठ्या राजकीय हालचाली? (Sunetra Pawar) या संपूर्ण प्रकरणावर प्रफुल्ल पटेल यांनी अद्याप कोणतीही अधिकृत प्रतिक्रिया दिलेली नाही. मात्र, राष्ट्रवादीच्या या नव्या रचनेमुळे आगामी काळात मोठ्या राजकीय हालचाली होऊ शकतात ही शक्यता नाकारता येणार नाही. हेही वाचा : Satara BJP : “हे काय डोनाल्ड ट्रम्प आहेत का?” साताऱ्यात भाजपच्या दोन बड्या पदाधिकाऱ्यांमध्ये जुंपली
