छत्रपती संभाजीनगर : बियर बॉटलचे बॉक्स घेवून जाणार कंटेनर उलटल्यानंतर कंटेनरच्या चालक केबिनमध्ये अडकला होता. यावेळी तो मला बाहेर काढा अशी विनंती करत होता, मात्र नागरिकांनी चालकाला वाचवायचे सोडून बियरचे बॉक्स घेवून पळून जाणे पसंत केले. अखेर अग्निशामक दलाने चालकाची सुटका केली मात्र तोपर्यंत सुमारे २ तास वाहतूक ठप्प झाली होती. मिळालेल्या माहितीनूसार, सय्यद अब्दुल्ला हा चालक एका बियर कंपनीचा मालाने भरतलेला कंटेनर घेवून छ. संभाजीनगरवरुन जळगावच्या दिशेने चालला होता. यावेळी वाळुंज येथील धनुष्यबानाच्या कमानीजवळ आला असता, चालकाचे नियंत्रण सुटून कंटेनर डिव्हायडरला धडकून रस्त्यावरच उलटला. यामुळे कंटेनरमधून दोन हजार बिअर बॉटल व बॉक्स रस्त्यावर पडले. याबरोबरीने मोठ्या प्रमाणात डिझेल गळती देखील झाली. कंटेनर उलटल्याने चालक देखील केबिनमध्येच अडकून राहिला. यावेळी चालक मदतीसाठी विनवणी करत होता मात्र, येणार्या जाणार्या लोकांनी चालकाला मदत करायची सोडून पडलेल्या बियरच्या बाटल्या व बॉक्स उचलून नेण्यात धन्यता मानली. अखेर पोलीसांना या अपघाताची माहिती मिळाली. त्यांनी तातडीने अग्निशामक दलाला पाचारण केले. बियरच्या बाटल्या उचलण्यासाठी लोकांनी मोठी गर्दी केली होती. अखेर जमावाला पांगवण्यासाठी अग्निशामक दलाला पाण्याच्या फवार्याचा वापर करावा लागला. त्यानंतर जमाव पांगल्यानंतर अखेर जखमी चालकाला सुरक्षित बाहेर काढण्यात आल्यानंतर उपचारांसाठी रुग्णालयात दाखल करण्यात आले. त्यानंतर कंपनीच्या अधिकाऱ्यांनी रस्त्यावर पडलेल्या बाटल्या व इतर गोष्टी अन्य वाहनाच्या मदतीने माघारी नेल्या. या प्रकरणाचा पुढील तपास वाळुंज पोलीस करत आहेत.
