Phaltan: येथील खासगी क्लासेसमध्ये पाचवीमध्ये शिकणाऱ्या विद्यार्थ्याला क्लासमधील शिक्षिकेने काठी, हात आणि झाडूने मारहाण केल्याचा, तसेच नववी- दहावीतील काही विद्यार्थ्यांना सांगून त्यांच्याकडून मारहाण केल्याची तक्रार विद्यार्थ्याच्या वडिलांनी फलटण शहर पोलीस ठाण्यात दाखल केली आहे.

या मारहाण केल्याच्या गंभीर प्रकारामुळे एकच खळबळ उडाली असून या घटनेमुळे विद्यार्थ्यांच्या सुरक्षिततेचा प्रश्न ऐरणीवर आला आहे. फलटण शहर पोलीस ठाण्यात मारहाण झालेल्या मुलाच्या वडिलांनी दिलेल्या तक्रारीनुसार, कोळकी येथील मारुती कवडे यांच्या क्लासेस शिकवणीसाठी हा विद्यार्थी जात होता. क्लासमध्ये खेळण्याच्या कारणावरुन क्लासमधील शिक्षिकेने मुलाला काठीने व हाताने मारहाण केल्याचे तसेच नववी- दहावीतील काही विद्यार्थ्यांना सांगून त्यांच्याकडून मारहाण केल्याचा प्रकार मुलाने घरी सांगितला.

तसेच मुलाला यापुढे क्लासला पाठवायचे नसल्याचे स्पष्ट सांगितले असतानाही पूर्वपरवानगीशिवाय त्याला क्लासमध्ये नेण्यात आल्याचे वडिलांनी तक्रारीत म्हटले आहे. त्यानंतर पोलिसांच्या मदतीने मुलाला क्लासमधून घरी आणल्याचे त्यांनी सांगितले. याप्रकरणी वडिलांनी शहर पोलीस ठाण्यात शिक्षिका व मारहाण करणारी मुले यांच्याविरोधात तक्रार दाखल केली आहे. पोलिसांनी गुन्हा दाखल केला आहे.