नवी दिल्ली : देशात थंडीचा कडाका वाढला असून नवी दिल्लीतील तापमानाचा पारा सतत घसरत आहे. देशाच्या राजधानीत रविवारी सकाळी तापमानाचा पारा ९ अंश सेल्सिअस नोंदवण्यात आला. हे सामान्यपेक्षा ४.५ अंश कमी असून तीन वर्षांमधील निच्चांकी तापमान आहे. हवामान खात्याने दिलेल्या माहितीनुसार, २९ नोव्हेंबर २०२२ रोजी दिल्लीतील तापमान ७.३ अंश सेल्सिअस नोंदवण्यात आले होते, त्यानंतर या महिन्यातील सर्वात कमी तापमान होते. २०२३ मध्ये, २३ नोव्हेंबर रोजी पारा ९.२ अंशांवर घसरला होता. २०२४ मध्ये २९ नोव्हेंबर रोजी ९.५ अंश सेल्सिअस इतक्या तापमान नोंदवण्यात आले होते. भारतीय हवामान विभागाने दि. १८ आणि १९ नोव्हेंबर रोजी आकाश अंशतः ढगाळ आणि सकाळी धुक्याचे वातावरण राहण्याचा अंदाज वर्तवला आहे. दिल्लीतील कमाल तापमान २४ ते २६ अंश सेल्सिअस दरम्यान राहण्याची शक्यता आहे, तर किमान तापमान १२ अंश सेल्सिअसच्या आसपास राहण्याची शक्यता आहे. दरम्यान, देशातील अनेक राज्यात तीव्र थंडीची लाट येण्याचा इशारा देखील दिला आहे.
