मुंबई – “परीक्षार्थी विद्यार्थ्यांनी आपली तयारी सुरू ठेवावी. येत्या आठवडाभरात परीक्षा होणार हे वचन देतो. वयाची मर्यादा आडवी येणार नाही. उद्याच परीक्षेची तारीख जाहीर करण्यात येईल. विरोधकांनी परीक्षेवरून राजकारण करू नये. तसेच विद्यार्थ्यांनी राजकीय बंदूक वापरण्याचा खांदा होऊ देऊ नये.” असे मुख्यमंत्री उद्धव ठाकरे यांनी लाईव्हद्वारे सांगितले.

येत्या रविवारी (ता.14) रोजी होणारी एमपीएससीची पूर्व परीक्षा आयोगाने करोनाच्या वाढत्या प्रादुर्भावामुळे अनिश्चित काळासाठी पुढे ढकलली आहे. अवघ्या तीन दिवसांवर आलेल्या परीक्षा पुढे ढकलल्याने विद्यार्थ्यी संतप्त झाले आहेत.

पुण्यातील नवी पेठ येथे विद्यार्थ्यांनी मोठ्या संख्येने एकत्र येत रास्ता रोको केला. तसेच सरकार विरोधी घोषणाबाजी केली. आयोगाच्या निर्णयावर अनेक राजकीय नेत्यांनीही प्रतिक्रिया देत सरकारला सुनावले. त्यानंतर मुख्यमंत्री उद्धव ठाकरे यांनी लाईव्ह येऊन परीक्षेसंदर्भात माहिती देत आठवडाभरातच परीक्षा होणार असल्याचे विद्यार्थ्यांना आश्वासन दिले आहे.