पिंपरी : केंद्र सरकार काही वर्षापासून कामगार विरोधी धोरणे आणि कायदे आखत असून त्याचा परिणाम देशभरातील कोट्यावधी कामगारावरती होत आहे. महागाईचे धोरण,बेरोजगारी वाढवणारी नीती आहे त्याचबरोबर कामगारांना देशोधडीला लावणाऱ्या ४ श्रमसंहिता आणल्या आहेत त्यामुळे कामगारांचे नुकसान होत आहे,असा आक्षेप घेत देशभरातील कामगार संघटनानी बंद पुकारला. कष्टकरी संघर्ष महासंघाने याला पाठिंबा दिला असून संपात सहभागी झाले .

कष्टकरी संघर्ष महासंघ महाराष्ट्र, महाराष्ट्र फेरीवाला क्रांती महासंघ, बांधकाम कामगार, घरेलू कामगार, कंत्राटी कामगार अशा विविध घटकातील कामगारांनी या आंदोलनाला पाठिंबा दिला. पिंपरी चिंचवड शहरातील थरमॅक्स चौक, डांगे चौक, रहाटणी , निगडी , एमआयडीसी या ठिकाणी घोषणा देत संपात कामगार सहभागी झाले.

यावेळी कामगार नेते काशिनाथ नखाते, प्रदेश उपाध्यक्ष राजेश माने, भास्कर राठोड,मनपा सदस्य सलीम डांगे,नंदू आहेर,सुनील भोसले, कालिदास गायकवाड, सुनील भोसले, राजेंद्र कुटकर, प्रशांत मोरे, रमेश बंडगर ,संदीप कांबळे, महादेव गायकवाड, निरंजन लोखंडे आदीसह कामगार उपस्थित होते.

नखाते म्हणाले की देशभरातील संघटनांनी देशव्यापी संप पुकारलेला आहे. विविध क्षेत्रातील कामगारांनी कामगारांच्या हक्कासाठी हा बंद पुकारला आहे. केंद्र सरकारकडून मालक वर्गावर मेहेर नजर आणि कामगार देशोधडीला लावण्यासाठी ४ कामगार श्रम संहिता लादण्याचे प्रयत्न होत आहेत. सरकारच्या चुकीच्या धोरणामुळे विषमता वाढत जाते आहे, कामगार चळवळ दडपण्याचे प्रयत्न केंद्र सरकार व राज्य सरकार करत आहे. महागाईनुसार वेतन वाढ होणे गरजेचे असताना केवळ ठराविक लोकांना भरमसाठ पगार देण्यात येतो आणि खऱ्या अर्थाने कष्टकरी कामगार वाऱ्यावर सोडण्याचे काम केंद्र आणि राज्य सरकार करीत आहे. हे थांबले नाही तर विधानभवनावर आंदोलन केल्याशिवाय राहणार नाही.