Chhota Warkari : महाराष्ट्राचे मुख्यमंत्री देवेंद्र फडणवीस यांच्या हस्ते आज वर्षा बंगला येथे “छोटा वारकरी” या अभिनव आणि संस्कारमूल्य जपणाऱ्या ॲनिमेशन कॅरेक्टरचे अधिकृत उद्घाटन करण्यात आले. या वेळी “छोटा वारकरी” या संकल्पनेचे प्रमुख व “Facebook Dindi – Virtual Dindi” उपक्रमाचे संस्थापक स्वप्नील मोरे यांनी या उपक्रमामागील उद्दिष्ट स्पष्ट केले. गेल्या १५ वर्षांपासून “Facebook Dindi”च्या माध्यमातून वारकरी संप्रदायाचा प्रचार-प्रसार करत डिजिटल पद्धतीने वारीची परंपरा लोकांपर्यंत पोहोचवण्याचे कार्य त्यांनी केले असल्याचे त्यांनी सांगितले. आजच्या डिजिटल युगात लहान मुलांना वारकरी संप्रदाय, संतांची शिकवण आणि महाराष्ट्राची सांस्कृतिक परंपरा समजावून सांगण्यासाठी आधुनिक माध्यमाची गरज असल्याचे त्यांनी नमूद केले. “छोटा वारकरी” हा त्याच दिशेने उचललेला महत्त्वपूर्ण उपक्रम असल्याचेही त्यांनी स्पष्ट केले. या माध्यमातून संत तुकाराम महाराज, संत ज्ञानेश्वर, संत नामदेव यांच्या अभंग, शिकवणी आणि संस्कार कथा व ॲनिमेशनच्या माध्यमातून मुलांपर्यंत सोप्या आणि रंजक पद्धतीने पोहोचवले जाणार आहेत. तसेच वारीदरम्यान शासनाच्या जनजागृती मोहिमा व माहिती प्रभावीपणे पोहोचवण्यासाठी “छोटा वारकरी” हा डिजिटल इन्फ्लुएंसर म्हणूनही कार्य करणार आहे. Chhota Warkari : मुख्यमंत्री फडणवीस यांनी या उपक्रमाचे कौतुक करत अशा संकल्पनांमुळे महाराष्ट्राची परंपरा आणि संतविचार नव्या पिढीपर्यंत प्रभावीपणे पोहोचतील, असा विश्वास व्यक्त केला. त्यांनी “Facebook Dindi” आणि “Virtual Dindi” या उपक्रमांबाबतही सविस्तर माहिती घेतली. यावेळी “छोटा वारकरी”च्या 3D कॅरेक्टर मॉडेलचे अनावरण करण्यात आले. या प्रसंगी स्वप्नील मोरे यांचा सुपुत्र वैष्णव आणि कन्या वारी यांनीही सहभाग घेतला. त्यांच्या उपस्थितीमुळे कार्यक्रम अधिक भावपूर्ण ठरला. कार्यक्रमास मुख्यमंत्री कार्यालयातील OSD कुमारी निधी कामदार, पूजा मोरे, संतोष पाटील, कल्पेश मोरे तसेच इतर मान्यवर उपस्थित होते. “छोटा वारकरी” हा केवळ ॲनिमेशन कॅरेक्टर नसून महाराष्ट्राच्या संस्कृतीचा आणि वारकरी परंपरेचा आधुनिक दूत ठरणार आहे. या उपक्रमामुळे मुलांमध्ये संस्कार, भक्ती आणि परंपरेबद्दल अभिमान निर्माण होईल, अशी अपेक्षा व्यक्त करण्यात आली. Chhota Warkari :
