मुंबई :   चंद्रकांत पाटील यांनी काही दिवसांपूर्वी एका पत्रकार परिषदेत छत्रपती शिवाजी महाराजांनी हिंदू व्होट बँक तयार केली असालीचे सांगत वाद निर्माण केला होता. आता त्यांच्या नंतर राष्ट्रीय समाज पक्षाचे सर्वेसर्वा महादेव जानकर  यांनी छत्रपती शिवाजी महाराजही ओबीसी होते  असे विधान केले आहे. त्यांच्या या विधानामुळे नव्या वादाला तोंड फुटणार असल्याचे दिसत आहे.

परभणी जिल्ह्यातल्या गंगाखेडमध्ये आयोजित कार्यक्रमात महादेव जानकर यांनी उपस्थिती लावली, यावेळी त्यांनी मराठा, ओबीसी आरक्षणावरुन राज्य सरकारवर टीका केली. इतकंच नाही तर आमदार म्हणून निवडून देण्याचे आवाहन करताना मराठा, मुसलमान, ओबीसी सगळ्यांना आरक्षण देतो असे आश्वासन दिले.

“आमचं होऊ द्या ३०-३५ आमदार, १० मिनिटात ओबीसीची गंमत करुन टाकतो. मराठ्यांना पण आरक्षण देऊ शकतो आणि मुस्लिमांनाही आरक्षण देतो. मुसलमानावर तर किती अन्याय आहे. गॅरेज बघितलं का मुसलमान, आंब्याचं दुकान बघितलं का मुसलमान, कोंबडीचं दुकान बघितलं की मुसलमान, त्याचा कुठं कलेक्टर नाय, काय नाय, बोंबा बोंब, टोपी घालून केळं विकतंय, फळं विकतंय अन् त्या मुसलमानाला लोक शिवा देतेत, हिंदू बी भिकारी अन् मुसलमान बी भिकारी, अन राज्य चालवणारा तिसराच मालक असतो ही गोष्ट लक्षात ठेवली पाहिजे,” असं महादेव जानकर यावेळी म्हणाले.

पुढे बोलताना त्यांनी सांगितले की, “मराठा समाजाला माझा विनंती आहे. शाहू महाराजांनी या देशात आरक्षण दिलं. मराठ्यांना आरक्षण होतं, पण नंतर आरक्षण का गेलं? शिवाजी राजादेखील ओबीसी होता. कुळवाडी भूषण राजा होता. आमच्यातल्या तथाकथित लोकांना वाटलं, आम्ही लय मोठं हाय गावचं, आम्हाला नको तसलं आरक्षण आणि आज अवस्था काय झाली आहे?”.