Police Bharti 2026 : छत्रपती संभाजीनगर शहरात रेल्वे पोलिसांनी आयोजित केलेल्या भरती मोहिमेदरम्यान भरतीसाठी इच्छुक असलेल्या २४ वर्षीय तरुणाचा शारिरीक चाचणीदरम्यान मृत्यू झाला आहे. शहरातील पोलिस परेड ग्राउंडवर शनिवारी सकाळी १६०० मीटर धावण्याच्या स्पर्धेत ही घटना घडली आहे. मृताचे नाव संग्राम शिंदे असे आहे. तो सांगली जिल्ह्यातील पलूस येथील रहिवासी आहे. धावताना अंतिम रेषेपूर्वी संग्राम शिंदे कोसळला. त्यांना तात्काळ रुग्णालयात नेण्यात आले जिथे उपचारादरम्यान त्यांचा मृत्यू झाला. याठिकाणी ९३ कॉन्स्टेबल पदांसाठी भरती मोहीम शुक्रवारी सुरू झाली. ६०० हून अधिक उमेदवारांनी या धावण्याच्या परीक्षेला हजेरी लावली होती. संग्राम अत्यंत मेहनती आणि जिद्दी होता. पोलिसात भरती झाल्यावर आपल्या कुटुंबातील दारिद्र्य त्याला दूर करायचं होतं. यासाठी गेल्या अनेक महिन्यांपासून सकाळी लवकर उठून तो सराव करीत होता. मात्र नशिबाला हे मान्य नव्हतं. संग्रामच्या अचानक झालेल्या निधनाने शिंदे कुटुंबावर दु:खाचा डोंगर कोसळला आहे. मात्र ही घटना हार्टअटॅकमुळे झाल्याचा अंदाज व्यक्त केला जात आहे. अद्याप या प्रकरणातील अधिकृत माहिती कळू शकलेली नाही. पोस्टमार्टम रिपोर्टनंतरच संग्रामला नेमकं काय झालं होतं, हे लक्षात येईल.
