गुजरात जायंट्सने राजस्थान वॉरियर्सचा उडवला मोठा धुव्वा
तेलगूयोद्धास पाठोपाठ गुजरात जायंट्सची उपांत्य फेरीत धडक
कर्णधार प्रतिक वाईकर व संकेत कदमला अष्टपैलू खेळाडूचा पुरस्कार

भुवनेश्वर  – अल्टीमेट खो-खोच्या सीझन २ मध्ये आज झालेल्या पहिल्या सामन्यात तेलगू योद्धासच्या हल्यात चेन्नई क्विक गन्स धारातीर्थी पडला. हा सामना तेलगू योद्धास ८ गुणांनी जिंकला व पहिल्यांदा उपांत्य फेरीत धडक मारणारा संघ ठरला तेलगु योद्धास. दुसऱ्या सामन्यात गुजरात जायंट्सने राजस्थान वॉरियर्सचा २४ गुणांनी मोठा धुव्वा उडवला व उपांत्य फेरीत धडक मारणारा दुसरा संघ ठरला. हे सामने कटक येथील जवाहरलाल नेहरू इनडोअर स्टेडियमवर पार पडले. आजच्या सामन्यामध्ये प्रतिक वाईकर व संकेत कदमला अष्टपैलू खेळाडूचा पुरस्कार देऊन गौरवण्यात आले.

विसाव्या सामन्यापर्यंत चेन्नई क्विक गन्सचा रामजी कस्यप १८.४९ मि. संरक्षण, ५४ गुणांसह संरक्षण, आक्रमणात तसेच आकाषीय सूर मारण्यात (१७ वेळा) व सूर मारून बाद करण्यात (३६ गुण) अल्टीमेट खो-खो सीझन २ मध्ये प्रथम क्रमांकावर आहे. तेलगू योद्धासचा प्रतिक वाईकर वजीर म्हणून ४२ गुणांसह व स्तंभात खेळाडू बाद करणे (८ वेळा) या प्रकारात प्रथम क्रमांकावर आहे. सहज स्पर्शाने बाद करण्यात मुंबईचा गजानन शेंगाळ (२६ गुण) प्रथम क्रमांकावर आहे.

आज झालेल्या पहिल्या व एकूण एकविसाव्या सामन्यात तेलगू योद्धासने चेन्नई क्विक गन्सचा ३८-३० (मध्यंतर २५-१२) असा आठ गुणांनी पराभव केला. तेलगू योद्धासला मध्यंतराला मिळालेली १३ गुणांची आघाडी निर्णायक ठरली. चेन्नई क्विक गन्सने नाणेफेक जिंकून प्रथम संरक्षण घेतले व तेलगू योद्धासला आक्रमणासाठी आमंत्रित केले. सात मिनिटांच्या पहिल्या टर्नमध्ये चेन्नई क्विक गन्सच्या पहिल्या तुकडीतील सुमोन बर्मनला सहज स्पर्शाने व लक्ष्मण गवसला स्तंभात प्रतिक वाईकरने लवकर बाद केले. तर आदर्श मोहितेला आकाशीय सूर मारत राहुल मंडलने बाद केले. आदर्शने डीएसआर घेतला पण तो त्याच्या विरोधातच गेला.

१.३७ मिनिटात पहिली तुकडी बाद झाली. दुसऱ्या तुकडीतील मदन व रामजी कश्यपला आकाशीय सूर मारत राहुल मंडलने बाद केले तर विजय शिंदेला अरुण गुणकीने स्तंभात बाद केले व पावणे चार मिनिटात हि तुकडी बाद झाली. तिसऱ्या तुकडीतील आकाश कदम व सुरज झोराला अनुक्रमे स्तंभात व आकाशीय सूर मारत राहुल मंडलने बाद केले व त्यानंतर दुर्वेश साळुंकेला प्रतिक वाईकरने आकाशीय सूर मारत बाद केले. चौथ्या तुकडीतील सुरज लांडेला सौरभ आडवकरने, सचिन भार्गोला मिलिंद चावरेकरने, आदित्य कुदळेला सौरभ आडवकरने सहज स्पर्शाने बाद केले. या स्पर्धेत प्रथमच संपूर्ण संघ बाद झाल्याची घटना घडली व तेलगू योद्धासने आक्रमणात २४ गुण वसूल केले.

दुसऱ्या टर्न मध्ये चेन्नई क्विक गन्सने पहील्यांदाच पॉवर प्लेने सुरवात केली ज्यात दोन वजीर मैदानात आक्रमण करत असतात. तेलगूयोद्धासच्या पहिल्या तुकडीतील अवधूत पाटीलला सचिन भार्गोने आकाशीय सूर मारत बाद केले व आदित्य गणपुलेला रामजी कश्यपने सुध्दा आकाशीय सूर मारत बाद केले व जवळजवळ पावणेतीन मिनिटांच्या आत हि तुकडी बाद केली. दुसऱ्या तुकडीतील राहुल मंडलला आदित्य कुदळेने सहज स्पर्शाने बाद केले तर ध्रुवला सुरज लांडेने आकाशीय सूर मारत बाद केले हा अतिशय सुंदर असा बळी डीएसआर द्वारे निश्चीत केला. तर आकाश तोगरेला सुरज लांडेने आकाशीय सूर मारत बाद केले मात्र त्याआधी आकाशने एक ड्रीम रन्सचा गुण मिळवून दिला. त्याचबरोबर तिसऱ्या तुकडीतील एकही संरक्षक बाद न झाल्याने मध्यंतराला तेलगू योद्धासने चेन्नई क्विक गन्सवर २५-१२ अशी तब्बल १३ गुणांची आघाडी घेतली.

मध्यंतरानंतर तिसऱ्या टर्न मध्ये चेन्नई क्विक गन्सच्या पहिल्या तुकडीतील आदर्श मोहितेला प्रसाद पाटीलने आकाशीय सूर मारत बाद केले. लक्ष्मण गवसला अरुण गुणकीने स्तंभात बाद केले तर सुमोन बर्मनला आदित्य गणपुलेने आकाशीय सूर मारत बाद केले मात्र त्याआधी सुमोनने दोन ड्रीम रन्सचे गुण मिळवून दिले व हि तुकडी ३.४० मिनिटात बाद झाली, दुसऱ्या तुकडीतील रामजी कश्यपला सौरभ आडवकरने आकाशीय सूर मारत बाद केले, मदनला व विजय शिंदे मिलिंद चावरेकरने सहज स्पर्शाने लागोपाठ बाद केले. तर तिसऱ्या तुकडीतील कोणीही संरक्षक बाद झाला नाही.

शेवटच्या व चौथ्या टर्न मध्ये तेलगू योद्धासने चेन्नई क्विक गन्सला ३७-१४ असे पिछाडीवर टाकल्याने चेन्नई क्विक गन्सला विजयासाठी २४ गुणांचे आव्हान दिले. तेलगू योद्धासच्या पहिल्या तुकडीतील किरण वसावेला सुरज लांडेने बाद केले, एम फणी कुमारला सुमोन बर्मनने आकाशीय सूर मारत बाद केले तर मिलिंद चावरेकरला रामजी कश्यपने सहज स्पर्शाने बाद केले व पहिली तुकडी २.४० मिनिटात बाद झाली. दुसऱ्या तुकडीतील सौरभ आडवकरला आकाश कदमने सहज स्पर्शाने बाद केले तर प्रसाद पाटीलला आदित्य कुदळेने व अरुण गुणकीला सुरज लांडेने आकाशीय सूर मारत बाद केले. तिसऱ्या आदित्य गणपुलेला आकाश कदमने स्तंभात बाद केले, अवधूत पाटीलला आदित्य कुदळेने आकाशीय सूर मारत बाद केले व शेवटी प्रतिक वाईकरने दोन वेळा डीएसआर घेत नाबाद राहत एक ड्रीम रन्सचा गुण मिळवून दिला व हा सामना तेलगू योद्धासने ३८-३० असा आठ गुणांनी जिंकला. या सामन्यात राहुल मंडलला उत्कृष्ट आक्रमक, आदर्श मोहितेला उत्कृष्ट संरक्षक तर प्रतिक वाईकरला अष्टपैलू खेळाडूचा पुरस्कार देऊन गौरवण्यात आले.

आज झालेल्या दुसऱ्या व बाविसाव्या सामन्यात गुजरात जायंट्सने राजस्थान वॉरियर्सचा ४६-२२ (मध्यंतर २७-१०) असा २४ गुणांनी मोठा धुव्वा उडवला. गुजरात जायंट्सने नाणेफेक जिंकून प्रथम संरक्षण घेतले. या सामन्यातील पहिल्या टर्न मध्ये गुजरात जायंट्सच्या दिपक माधवला प्रज्वल के एच ने सहज बाद केले, शुभम थोरातला मजहर जमादारने आकाशीय सूर मारत बाद केले तर सुयश गरगटेला प्रज्वल के एच ने आकाशीय सूर मारत बाद केले मात्र त्यापूर्वी सुयशने एक ड्रीम रन्सचा गुण मिळवला. दुसऱ्या तुकडीतील पबनी साबरला प्रज्वल के एच ने आकाशीय सूर मारत बाद केले तर पी नरसय्याला सुशांत हजारेने बाद केल तर सेवटच्या खेळाडूने नाबाद राहत दोन ड्रीम रन्सचा गुण मिळवला.

दुसऱ्या टर्न मध्ये गुजरात जायंट्सच्या आक्रमकांनी जोरदार आक्रमणाने सुरवात केली व राजस्थान वॉरियर्सचा विजय हजारेला फैजंखा पठाणने, सुशांत हजारेला विनायक पोकार्डेने स्तंभात बाद केले. वृषभ वाघला व्ही सुब्रमणिने बाद केले. दुसऱ्या तुकडीतील नंदन डी ला पबनी साबरला आकाशीय सूर मारत बाद केले, दिलराजसिंग सेंगरला भरत कुमारने स्तंभात बाद केले, तर जगन्नाथ मुर्मूला राजवर्धन पाटीलला स्तंभात बाद केले. तिसऱ्या तुकडीतील सौरभ गाडगेला भरत कुमारने आकाशीय सूर मारत बाद केले, निलेश पाटीलला भरत कुमारने व सतेज पाटीलला शुभम थोरातने स्तंभात बाद केले व गुजरातने मोठ्या आघाडीकडे वाटचाल सुरु केली. चौथ्या तुकडीतील मरेप्पाला राजवर्धन पाटील आकाशीय सूर मारत बाद केले, मजहर जमादारला पबनी साबरने व प्रज्वल के एच ला फैजंखा पठाणने सहज स्पर्शाने बाद केले मोठी आघडी घेतली.

मध्यंतरानंतर तिसऱ्या टर्न मध्ये गुजरात जायंट्सच्या फैजंखा पठाणला आकाशीय सूर मारत व अक्षय भांगरेला सहज स्पर्शाने विजय हजारेने लागोपाठ बाद केले व अभिजित पाटीलला प्रज्वल के एच ने सहज बाद केले मात्र त्यापूर्वी अभिजितने दोन ड्रीम रन्सचे गुण मिळवून दिले. दुसऱ्या तुकडीतील व्ही सुब्रमणिला सौरभ गाडगेने आकाशीय सूर मारत बाद केले, राम मोहनला आदित्य के एन ने स्तंभात बाद केले त्यापूर्वी त्याने एक ड्रीम रन्सचा गुण मिळवून दिला.

शेवटच्या व चौथ्या टर्न मध्ये गुजरात जायंट्सकडे मोठी आघाडी होती व त्याच्या दबावात राजस्थानची पहिली तुकडी मैदानात उतरली व पहिल्या तुकडीने कडवी लढत दिली. मात्र त्यावेळी ती वेळ निघून गेली होती. सुशांत हजारेला संकेत कदमने सहज बाद केले, विजय हजारे स्वत:च्या चुकीने बाद झाला तर वृषभ वाघने दोन ड्रीम रन्सचे गुण मिळवून दिले व पबनी साबर कडून सहज बाद झाला. दुसऱ्या तुकडीतील सतेज पाटीलला राम मोहनने सहज बाद केले, सौरभ गाडगेला सुयश गरगटेने सहज बाद केले व निलेश पाटीलला राम मोहनने आकाशीय सूर मारत बाद केले. तिसऱ्या तुकडीतील नंदन डी ला अभिजित पाटीने सहज बाद केले व रेजेती सुरीनायडूला राम मोहनने आकाशीय सूर मारत बाद केले व सामना गुजरात जायंट्सने सहज खिशात घातला. या सामन्यात प्रज्वल के एच ला उत्कृष्ट आक्रमक, राम मोहनला उत्कृष्ट संरक्षक तर संकेत कदमला अष्टपैलू खेळाडूचा पुरस्कार देऊन गौरवण्यात आले.

शनिवारी पहिला सामना तेलगूयोद्धास व चेन्नई क्विक गन्स यांच्यात तर दुसरा सामना गुजरात जायंट्स व राजस्थान वॉरियर्स यांच्यात रंगेल. खो खो फेडरेशन ऑफ इंडियाच्या सहकार्याने अमित बर्मन यांनी अल्टीमेट खो खो स्पर्धा सुरु केली असून हे सर्व अल्टीमेट खो-खो चे सामने दररोज सायंकाळी ७.३० पासून सोनी स्पोर्ट्स नेटवर्क चॅनेल व सोनी लीव अॅपवर थेट पहाता येतील.