Chemist Strike – औषधांच्या बेकायदेशीर ऑनलाइन विक्रीविरोधात आणि कॉर्पोरेट कंपन्यांकडून होणाऱ्या अव्यावसायिक स्पर्धेविरोधात निषेध नोंदवण्यासाठी देशभरातील १५ लाखांहून अधिक केमिस्ट आणि औषध विक्रेते २० मे रोजी संपावर जाणार आहेत, असे ऑल इंडिया ऑर्गनायझेशन ऑफ केमिस्ट्स अँड ड्रगिस्ट्सने सोमवारी जाहीर केले. ठाणे येथे आयोजित पत्रकार परिषदेला बोलताना ऑर्गनायझेशनचे अध्यक्ष जगन्नाथ शिंदे यांनी सांगितले की, कोविड-१९ महामारीच्या काळात जारी करण्यात आलेल्या काही अधिसूचना मागे घेण्याच्या मागणीसाठी हा देशव्यापी बंद पुकारण्यात आला आहे. या अधिसूचनांमुळे ऑनलाइन औषध विक्रीचा गैरवापर होण्यास कथितरित्या वाव मिळाला होता. या बंदच्या काळात रुग्णालयांना संलग्न असलेली औषधांची दुकाने मात्र सुरू राहतील आणि आपत्कालीन औषध सेवांमध्ये कोणताही व्यत्यय येणार नाही. ऑनलाइन विक्रीमुळे बनावट औषधे, प्रतिजैविके आणि डॉक्टरांच्या चिठ्ठीशिवाय औषधे देण्याचा प्रसार वाढला आहे. यामुळे सार्वजनिक आरोग्याला विशेषतः तरुणांच्या आरोग्याला गंभीर धोका निर्माण झाला आहे. औषधांची ऑनलाइन विक्री देशासाठी धोकादायक बनली असून, तिला तातडीने आणि प्राधान्याने आळा घालणे गरजेचे आहे. शिवाय, ऑनलाइन कंपन्यांकडून दिल्या जाणाऱ्या मोठ्या सवलती या लहान केमिस्ट आणि किरकोळ विक्रेत्यांसाठी मृत्यूची घंटा ठरत आहेत, असा आरोप त्यांनी केला. कोरोनाकाळात औषधांची घरपोच डिलिव्हरी करण्यासाठी केंद्र सरकारने काही विशेष सवलती दिल्या होत्या, परंतु महामारी संपून अनेक वर्षे लोटली असूनही, त्या तरतुदी अजूनही सुरूच आहेत, याकडे शिंदे यांनी लक्ष वेधले.
