पिंपरी (प्रतिनिधी) – डॉ. बाबासाहेब आंबेडकर यांची गुरुवारी (दि. 14) जयंती आहे. त्यानिमित्त अभिवादन करण्यासाठी मोठ्या संख्येन अनुयायी पिंपरी चौकात येतात. यामुळे गुरुवारी दुपारी तीन वाजल्यापासून पिंपरी चौकातील वाहतुकीमध्ये बदल करण्यात आले आहेत.

असे असतील बदल….

चिंचवड स्टेशनकडून डॉ. बाबासाहेब आंबेडकर चौक, पिंपरीकडे सर्व्हिस रोडने येणारी वाहतूक बंद करून डी मार्ट इनग्रेड सेपरेटर मध्ये वळविण्यात येणार आहे. नाशिक फाटयाकडून डॉ. बाबासाहेब आंबेडकर चौक, पिंपरीकडे सर्व्हिस रोडने येणारी वाहतूक बंद करून डेअरी फार्मग्रेड सेपरेटर इन व एच. पी. पंप खराळवाडी ग्रेड सेपरेटरमध्ये वळविण्यात येणार आहे. तसेच स्व. इंदिरा गांधी पूल ते डॉ. बाबासाहेब आंबेडकर चौक पिंपरीकडे येणारा मार्ग बंद करून ही वाहतूक लिंक रोडकडे वळविण्यात येणार आहे.

याशिवाय नेहरुनगर चौकाकडून डॉ. बाबासाहेब आंबेडकर चौक, पिंपरीकडे येणारी वाहतूक बंद करून एच. ए. कॉर्नर बस स्टॉप येथून मासुळकर कॉलनीकडे वळविण्यात येत आहे. तसेच सम्राट चौक ते अहिल्यादेवी चौक पिंपरी दरम्यानचा रोड वाहतुकीस बंद करण्यात येणार आहे. गुरुवारी दुपारी तीन ते मध्यरात्रीपर्यंत वाहतुकीमधील हे बदल असणार असल्याची माहिती वाहतूक विभगाचे पोलीस उपायुक्‍त आनंद भोईटे यांनी प्रसिद्धीत दिलेल्या पत्रकाद्वारे दिली आहे.