कोल्हापुर : राज्यात देवस्थान इनाम जमिनी मोठ्या प्रमाणावर आहेत. या देवस्थान जमीनींचे खरेदी-विक्री व्यवहार केले जात आहेत. या पार्श्वभूमीवर राज्य सरकारने महत्त्वाचा निर्णय घेतला आहे. देवस्थान जमिनीबाबत राज्य सरकार धोरण ठरवत आहे. तोपर्यंत या जमिनींची दस्त नोंदणी करणे थांबवण्यात यावी, असे निर्देश महसूलमंत्री चंद्रशेखर बावनकुळे यांनी दिले.

मंत्रालयात पश्चिम महाराष्ट्र देवस्थानच्या जमिनीबाबत आढावा बैठक आयोजित करण्यात आली होती. त्यावेळी महसूलमंत्री बोलत होते. यावेळी सार्वजनिक आरोग्य मंत्री प्रकाश आबिटकर, आमदार अमल महाडिक तर दूरदृश्य प्रणालीद्वारे कोल्हापूरचे जिल्हाधिकारी अमोल येडगे उपस्थित होते. चंद्रशेखर बावनकुळे म्हणाले की, देवस्थान इनाम मिळकतीच्या अनुषंगाने शासन स्तरावर धोरण ठरवण्याची कार्यवाही सुरू आहे.

त्यामुळे सक्षम प्राधिकाऱ्याच्या परवानगीशिवाय किंवा न्यायालयाचे आदेश असतील, त्याशिवाय राज्यातील सर्व देवस्थानच्या खरेदी आणि विक्रीच्या व्यवहारांची नोंदणी केली जाऊ नये. जर व्यवहार झाले तर त्यास दुय्यम निबंधक यांना जबाबदार धरण्यात येईल, असा इशारा बावनकुळे यांनी दिला.