नागपूर : निवडणूकीच्या तोंडावर जाहीर केलेली लाडकी बहीण योजना सातत्याने चर्चेत असून अनेकदा सत्ताधारी आणि विरोधक आमनेसामने आले आहेत. गेल्या काही काळात अपात्र महिलांची नावे या योजनेतून कमी करण्यात आली. तसेच, लाडकी बहीण योजनेचा फायदा हा पुरुषही घेत असल्याचे उघडकीस आले आहेत. याबाबत आता महसूल मंत्री चंद्रशेखर बावनकुळे यांनी याबाबत स्पष्ट विधान केले आहे. महिलांचे पैसे जर पुरुषांनी घेतले असेल, तर गुन्हा दाखल केला पाहिजे, पैसेही वसूल केले पाहिजे, असे त्यांनी स्पष्ट केले आहे. बावनकुळे म्हणाले, चुकीच्या पद्धतीने लाडक्या बहिणीने लाभ घेतले, त्यांच्याकडून वसुली केली जाणार नाही. हे सरकारने या आधीच स्पष्ट केले आहे. राज्य सरकारकडून राबवण्यात येत असलेल्या मुख्यमंत्री माझी लाडकी बहीण योजनेवर पुरुषांनी डल्ला मारल्याचा धक्कादायक प्रकार समोर आला आहे. त्यावर आता कारवाईची मागणी त्यांनी केली आहे. मंत्रिमंडळातील बदल करण्याचा सर्वस्वी अधिकार हा मुख्यमंत्र्यांचा आहे. शिवसेना तसेच राष्ट्रवादी काँग्रेस संदर्भामधील अधिकार त्या पक्षातील नेत्यांचा आहे. अंतिम निर्णय मुख्यमंत्री घेतील. पण, माझ्यासह मंत्रिमंडळातील सर्वांची सामूहिक जबाबदारी आहे की जनतेच्या मनात लोकप्रतिनिधी बद्दल काही वाईटपणा निर्माण होईल. जनतेच्या मनात लोकप्रतिनिधी बद्दल मत खराब होतील, असे वागणे योग्य नाही. यासाठी आम्ही सर्वांनी दक्ष राहिले पाहिजे, असेही त्यांनी स्पष्ट केले.
