मुंबई : काँग्रेसने माजी आमदार हर्षवर्धन सपकाळ यांची नियुक्ती केल्यानंतर महाराष्ट्र काँग्रेसमध्ये चलबिचल सुरू असल्याचे दिसून येत आहे. काँग्रेसमध्ये असलेल्या नेत्यांच्या तुलनेत अतिशय नवख्या नेत्याकडे अध्यक्षपदाची धुरा सोपविल्यामुळे अनेकांनी आश्चर्य व्यक्त केले आहे. आश्चर्य व्यक्त केलेल्या नेत्यांमध्ये राज्याचे माजी मुख्यमंत्री पृथ्वीराज चव्हाण यांचाही समावेश आहे. विशेषतः नुकत्याच झालेल्या विधानसभा निवडणुकीत काँग्रेसला दारूण पराभवाला सामोरे जावे लागले. अशा या आव्हानात्मक टप्प्यावर काँग्रेस पक्षाला पुनरुज्जीवित करू शकेल, अशा आक्रमक नेत्याची निवड करायला हवी होती, असे अनेक नेत्यांचे म्हणणे आहे.

एका वृत्‍तवाहीनीशी बोलताना पृथ्वीराज चव्हाण म्हणाले, पक्षाचे नेतृत्व करण्यासाठी काँग्रेसने माझ्याशी संपर्क साधला होता. पण तरूण नेत्याकडे ही जबाबदारी देण्यात यावी, असे मी सांगितले. पण जेव्हा हर्षवर्धन सपकाळ यांच्या नावाची घोषणा झाली, तेव्हा मलाही आश्चर्य वाटले. कारण त्यांचे नाव चर्चेतही नव्हते. मला वाटले होते, कोल्हापूरचे सतेज पाटील या पदावर येतील. आम्ही सतेज पाटील यांचे नाव पक्षश्रेष्ठींना कळवले होते. सतेज पाटील यांनी कदाचित प्रदेशाध्यक्षपदासाठी नकार दिला असावा.

सपकाळ यांना काँग्रेस पक्षाचे नेतृत्व करत असतानाच महाविकास आघाडीमधील पक्षांशी समन्वय ठेवावा लागणार आहे. यात उद्धव ठाकरे आणि शरद पवार यांच्यासारख्या मातब्बर नेत्यांचा समावेश आहे. जर प्रस्थापित नेत्यांनी हे पद घेण्यास नकार दिला असेल तर पक्षासमोर फारसा पर्याय उरलेला नाही. आमच्यासाठी आता हा विषय संपला आहे. सपकाळ पुढे कसे काम करतात, हे पाहू.

काँग्रेसचे कोल्हापूर जिल्हाध्यक्ष सतेज पाटील या निर्णयामुळे नाराज असल्याची चर्चा होती. पण त्यांनी प्रदेशाध्यक्षपदाबाबत नाराजी असल्याची चर्चा फेटाळून लावली. ते म्‍हणाले, कधी कधी साधे वाटणारे नेतेही पक्षाला एक मोठी उंची गाठून देतात. त्यामुळेच सपकाळ काँग्रेसला पुन्हा यश मिळवून देतील, अशी आम्हाला आशा आहे.