भवानीनगर : ऊस वाहतूक करताना ऊसतोड मजुरांनी स्वतःचा आणि आपल्या कुटुंबाच्या जीवाचा विचार करून सुरक्षिततेने काम करणे अत्यंत गरजेचे आहे. विशेषत: उसाने भरलेली बैलगाडी रस्त्याच्या उतारावर किंवा चढावर चालवताना बैल घसरून होणार्या अपघातांची शक्यता मोठी असल्याने खबरदारी घेणे आवश्यक असल्याचे आवाहन करण्यात येत आहे. इंदापूर तालुक्यातील श्री छत्रपती सहकारी साखर कारखान्याचा ऊस गळीत हंगाम सध्या सुरू असून बारामती व इंदापूर तालुक्यातील अनेक गावांमधून बैलगाड्यांद्वारे ऊस वाहतूक केली जाते; मात्र काही ठिकाणी मोठ्या उतारांवर बैलांचा तोल जाऊन ते रस्त्यावर आडवे पडल्याची घटना वारंवार दिसून येत आहे. अशावेळी बैलांचा जीव धोक्यात येतोच, परंतु ऊस वाहतूक करणार्या मजुरांनाही गंभीर जखमांचा धोका निर्माण होतो. तज्ज्ञांच्या मते, उताराच्या ठिकाणी उसाची लोड क्षमता नियंत्रित ठेवणे, गाडीचे संतुलन नीट ठेवणे, तसेच बैलांना योग्य विश्रांती देणे ही अत्यंत महत्त्वाची बाब आहे. थोडीशीही निष्काळजीपणा मोठ्या दुर्घटनेला आमंत्रण देऊ शकतो. मजुरांनी स्वतःच्या कुटुंबीयांच्या भवितव्याचा विचार करून व बैलांच्या जीविताचा आदर ठेवून सुरक्षिततेच्या नियमांचे पालन करणे अत्यावश्यक असल्याचे सांगण्यात येत आहे. ज्यामुळे रस्त्यावर अडचणी निर्माण न होता ऊस सुरक्षितपणे कारखान्यात दाखल होतो. स्थानिक प्रशासन व कारखाना व्यवस्थापनानेही ऊस वाहतुकीदरम्यान सुरक्षा जनजागृती वाढविण्याची आवश्यकता व्यक्त केली आहे.
