नवी दिल्ली : राष्ट्रीय स्वयंसेवक संघ आणि पंतप्रधान नरेंद्र मोदी यांच्याविरुद्ध आक्षेपार्ह कार्टून बनवल्याच्या प्रकरणात व्यंगचित्रकार हेमंत मालवीय यांना त्यांच्या आक्षेपार्ह व्यंगचित्राबद्दल दहा दिवसांच्या आत माफी मागण्यास सांगण्यात आले आहे. न्यायालयाने त्यांना अटकेपासून देण्यात आलेले अंतरिम संरक्षण पुढील सुनावणीपर्यंत वाढवले आहे. न्या. अरविंद कुमार आणि न्या. एन.व्ही. अंजारिया यांच्या खंडपीठाने मध्य प्रदेशात दाखल झालेल्या प्रकरणात मालवीय यांच्या अटकपूर्व जामीन अर्जावर सुनावणी केली.

सुनावणीदरम्यान, मालवीय यांच्या वतीने वकील वृंदा ग्रोव्हर म्हणाल्या की, मागील आदेशानुसार माफीनामा आधीच दाखल करण्यात आला आहे. हे प्रकरण फेसबुक पोस्टशी संबंधित असले तरी कार्टून असलेली पोस्ट सोशल मीडियावरून काढून टाकली जाईल. ही माफी फेसबुक, इंस्टाग्राम आणि इतर सर्व प्लॅटफॉर्मवर सार्वजनिक केली जाईल.

दुसरीकडे, मध्य प्रदेश सरकारच्या वतीने उपस्थित असलेले अतिरिक्त सॉलिसिटर जनरल केएम नटराज यांनी असा युक्तिवाद केला की चौकशी अद्याप सुरू असल्याने सध्या पोस्ट हटवू नये. आधी माफीनामा प्रकाशित करावा आणि आश्वासन दिले पाहिजे की कार्टूनिस्ट भविष्यात अशी चूक पुन्हा करणार नाही आणि तपासात पूर्ण सहकार्य करेल. दोन्ही पक्षांचे युक्तिवाद ऐकल्यानंतर, सर्वोच्च न्यायालयाने निर्देश दिले की हेमंत मालवीय यांना १० दिवसांच्या आत सोशल मीडियावर माफीनामा प्रकाशित करावा लागेल.