वारजे (सागर येवले) – प्रभाग कितीचा आणि कसा होतोय याची शाश्वती नाही तर समाविष्ट गावे प्रभागात घेणार की नाही याची माहिती नाही. त्यामुळे काम करायचे कुठे? असा प्रश्न “इच्छुक’ उमेदवारांना पडला आहे. वारजे, कर्वेनगर परिसरातील आजी-माजींसह “इच्छुकां’नी सावध पवित्रा घेत, प्रभाग कसाही होवो, सध्या तरी जुना प्रभाग आपलाच असूून त्यावर लक्ष केंद्रीत केले आहे तसेच लगतच्या परिसरातही जाणे-येणे वाढविले आहे.
वारजे-कर्वेनगर क्षेत्रीय कार्यालयाअंतर्गत चारच्या प्रभाग पध्दतीनुसार एकूण तीन प्रभाग होते. प्रत्येकी एक प्रभागात भाजप आणि राष्ट्रवादीचे वर्चस्व असून, एका प्रभागात तीन भाजप तर एक राष्ट्रवादी असे लोकप्रतिनिधी होते. महाविकास आघाडीने केलेल्या नव्याने तीनच्या प्रभाग पध्दतीत समाविष्ट गावांसह चार प्रभाग पडले. त्यामध्ये वारजे परिसरात दोन स्वतंत्र प्रभाग झाले. वारजे-कोंढवे धावडे आणि दुसरा रामनगर-उत्तमनगर शिवणे. तर तिसरा कर्वेनगर म्हणून स्वतंत्र प्रभाग आणि चौथा एरंडवणे आणि फर्ग्युसन रोड. यामध्ये भाजपची वोट बॅंक असलेले प्रभागांची तोडफोड करण्यात आली.
वारजे, उत्तमनगर हे दोन्ही प्रभाग राष्ट्रवादीसाठी अनुकुल आहे. कर्वेनगरमध्येही भाजप आणि राष्ट्रवादीची चुरस राहणार. हे सगळे अनुमान लावत असताना सरकार बदलले आणि पुन्हा चारच्या प्रभाग रचेनेची चर्चा सुरू झाली. तर आठ दिवसांपूर्वी पुन्हा प्रभाग चारचे नाही तर तीनचेच असतील, असे वेळोवेळी बदलत असलेल्या प्रभागामुळे इच्छुक संभ्रमात पडले आहेत.
गावातील मते ठरणार विजयी…
जोपर्यंत प्रभाग फायनल होऊन निवडणूक जाहीर होत नाही, तोपर्यंत आपला जुना प्रभागच बरा, त्यावरच लक्ष केंद्रीत करून गाठी-भेटी, बैठका, विकासकामे सुरू आहेत. त्यामुळे समाविष्ट गावातील नागरिकांना कोणी वालीच नाही. मात्र, भविष्यात या गावांचा प्रभागात समावेश झाला तर हेच मतदान “विजयी’ ठरू शकते.
होऊ दे खर्च…
महापालिका निवडणूक लांबल्याने अनेकांनी आखडता हात घेतला होता. परंतु, पुन्हा निवडणुकीचे वारे वाहू लागल्याने होऊ दे खर्च.., अशी भूमिका घेतली आहे. आता पुन्हा निवडणुकांचे बिगुल वाजणार असल्याने इच्छुक जोमाने तयारी लागले आहेत. वर्षभर खर्च केला आता दोन-चार महिने मागे कशाला हटायचे. नाहीतर खर्च आपला आणि निवडून यायाचा दुसरा, याविचारातून सर्वच इच्छुकांनी जोरदार तयारी सुरू केली आहे.