Captain Sumit Sabharwal ।  अहमदाबादमध्ये एअर इंडियाच्या विमान अपघातात प्राण गमावलेले पायलट कॅप्टन सुमित सभरवाल यांना आज अंतिम निरोप देण्यात आला. यादरम्यान, त्यांचे ९० वर्षीय वडील पुष्करराज सभरवाल मुलाचे पार्थिव पाहून अक्षरशः कोलमडून गेल्याचे दिसून आले. त्यांची ही अवस्था पाहून उपस्थितांचेही डोळे पाणावले होते. पुष्कराज यांनी यावेळी हात जोडून काही वेळ मुलाच्या पार्थिवासमोर उभे राहून प्रार्थना केली. त्यानंतर त्यांनी एकच हुंदका भरला. मात्र त्यानंतर त्यांना सावरण्यासाठी त्यांची मुलगी पुढे आली आणि तिने त्यांचे सांत्वन केले.

त्या अगोदर सभरवाल यांचे पार्थिव सकाळी अहमदाबादहून विमानाने मुंबई विमानतळावर आणण्यात आले. एका शवपेटीत ठेवण्यात आलेले सभरवाल यांचे पार्थिव त्यांच्या कुटुंबीयांनी मृतदेह पवई येथील जल वायु विहार येथील त्यांच्या निवासस्थानी नेला.

स्थानिक लोकांनी श्रद्धांजली वाहिली Captain Sumit Sabharwal । 

सभरवाल यांचे अनेक मित्र, नातेवाईक आणि स्थानिक रहिवासी श्रद्धांजली वाहण्यासाठी त्यांच्या निवासस्थानाबाहेर जमले होते. सभरवाल यांच्या निवासस्थानी श्रद्धांजली वाहण्यासाठी गेलेल्यांमध्ये उद्योगपती निरंजन हिरानंदानी आणि स्थानिक आमदार दिलीप लांडे यांचा समावेश होता. अधिकाऱ्याने सांगितले की नंतर वैमानिकाचा मृतदेह घेऊन जाणारी शववाहिका चकला इलेक्ट्रिक स्मशानभूमीकडे रवाना झाली. सभरवाल (५६) हे मुंबईत त्यांच्या वृद्ध पालकांसोबत राहत होते.

लंडनला जाणारे एअर इंडियाचे विमान (AI-171) १२ जून रोजी अहमदाबादमध्ये कोसळले होते, त्यात २४२ प्रवासी आणि क्रू मेंबर्स होते. विमान मेडिकल कॉलेज कॅम्पसमध्ये कोसळल्याने एका प्रवाशाशिवाय सर्वांचा मृत्यू झाला. मेडिकल कॉलेज कॅम्पसमध्ये उपस्थित असलेल्या इतर २९ लोकांचाही मृत्यू झाला. या विमानाचे नेतृत्व कॅप्टन सभरवाल आणि त्यांचे सहकारी फर्स्ट ऑफिसर क्लाईव्ह कुंदर करत होते. डीजीसीएने यापूर्वी एका निवेदनात म्हटले होते की, सभरवालला ८,२०० तासांचा उड्डाणाचा अनुभव होता, तर कुंदरला १,१०० तासांचा उड्डाणाचा अनुभव होता. Captain Sumit Sabharwal ।