रावेत – रावेत प्रभाग क्रमांक १६ मधील नागरिकांच्या सुरक्षित, स्वच्छ आणि शांत जीवनासाठी माजी नगरसेवक मोरेश्वर भोंडवे यांनी पुढाकार घेतला आहे. भोंडवे यांनी किवळे येथील प्रस्तावित दफनभूमी आणि के विला समोरील कचरा संकलन आरक्षण तात्काळ रद्द करण्याची मागणी करत नागरिकांच्या मनातील भावना थेट उपमुख्यमंत्री अजित पवार यांच्‍या समक्ष मांडल्‍या.

मोरेश्वर भोंडवे यांनी सांगितले की, या आरक्षणामुळे परिसरातील नागरिकांमध्ये तीव्र असंतोष निर्माण झाला आहे. नागरिकांचे आरोग्य, स्वच्छता आणि परिसरातील शांतता यावर याचा नकारात्मक परिणाम होत आहे. दफनभूमी व कचरा संकलन केंद्र अशा ठिकाणी ठेवणे म्हणजे नागरिकांच्या दैनंदिन जीवनात अस्वस्थता निर्माण करणे होय.भोंडवे यांनी नागरिकांच्या भावना आणि त्यांचे प्रश्न समजून घेत, त्यांचा आवाज प्रभावीपणे उपमुख्यमंत्र्यांपर्यंत पोहोचविला.

भोंडवे यांनी यापूर्वीही रावेत परिसरातील अनेक सामाजिक आणि नागरी समस्यांवर ठोस भूमिका घेत विकासकामांसाठी पुढाकार घेतला आहे. या भेटीत भोंडवे यांनी केवळ समस्या मांडली नाही, तर नागरिकांच्या हिताचा विचार करून त्या समस्येचे समाधानकारक पर्यायही सुचवले. त्यांच्या या दूरदृष्टीपूर्ण आणि ठाम भूमिकेमुळे अजित पवार यांनी नागरिकांच्या भावनांचा सन्मान राखत, या विषयावर सकारात्मक निर्णय घेण्याचे आश्वासन दिले.

मोरेश्वर भोंडवे यांच्या या पुढाकाराचे संपूर्ण परिसरात कौतुक होत आहे. “रावेत-किवळे परिसरासाठी मोरेश्वर भोंडवे खरे जनसेवक आहेत. त्यांनी नागरिकांचा आवाज प्रशासनापर्यंत नेहमीच पोहोचवला आहे,” असे मत स्थानिक नागरिकांनी व्यक्त केले.