Nora Fatehi: बॉलिवूड अभिनेत्री आणि डान्सर नोरा फतेही सध्या एका वेगळ्याच कारणामुळे चर्चेत आली आहे. चार्टर्ड विमानाबाबत केलेली टिप्पणी आता तिच्यासाठी कायदेशीर अडचणीचे कारण ठरली आहे. एका खासगी विमान कंपनीने नोरा फतेहीविरोधात गुजरातमधील गांधीनगर कोर्टात ३ कोटी रुपयांचा मानहानीचा दावा दाखल केला आहे. कंपनीच्या म्हणण्यानुसार, नोराने विमानाबाबत केलेल्या काही टिप्पण्यांमुळे त्यांच्या व्यवसायाच्या प्रतिमेला मोठा धक्का बसला.

या प्रकरणाची सुनावणी गांधीनगरमधील वरिष्ठ दिवाणी न्यायाधीश आर. अग्रवाल यांच्या न्यायालयात होणार आहे. २५ सप्टेंबर रोजी या प्रकरणावर सुनावणी होण्याची शक्यता आहे.

नेमकं काय घडलं? (Nora Fatehi)

या वादाची सुरुवात गेल्या वर्षी डिसेंबरमध्ये झाली. नोरा फतेही मुंबईहून जयपूरला जाण्यासाठी एका खासगी चार्टर्ड विमानाने प्रवास करत होती. हे विमान सेसना सायटेशन CJ2 असल्याचे सांगितले जात आहे. प्रवासादरम्यान नोराने विमानातील काही व्हिडिओ तयार केले आणि ते सोशल मीडियावर शेअर केले. या व्हिडिओमध्ये नोराने विमानाला ‘लेगो विमान’, ‘टॉय प्लेन’ आणि खूप छोटं विमान अशा शब्दांत संबोधल्याचा आरोप आहे. तिच्या या टिप्पण्यांवरूनच आता वाद निर्माण झाला आहे.

कंपनीचा मोठा आरोप  (Nora Fatehi)

ड्यून्स एव्हिएशन या खासगी विमान कंपनीने नोराच्या या वक्तव्यांवर आक्षेप घेतला आहे. कंपनीच्या म्हणण्यानुसार, नोराचे सोशल मीडियावर मोठ्या प्रमाणात फॉलोअर्स आहेत. त्यामुळे तिच्या बोलण्याचा मोठ्या संख्येने लोकांवर परिणाम होऊ शकतो.

कंपनीने दावा केला आहे की, नोराच्या पोस्टनंतर काही ग्राहकांनी आधी केलेल्या बुकिंग रद्द केल्या. तसेच नवीन बुकिंगमध्येही घट झाली. कंपनीच्या म्हणण्यानुसार, त्यांच्या व्यवसायातील बुकिंग जवळपास १५ ते २० टक्क्यांनी कमी झाल्या.

कंपनीने न्यायालयात असा दावा केला आहे की, नोराच्या वक्तव्यामुळे त्यांच्या विमानांच्या सुरक्षिततेबाबत ग्राहकांमध्ये चुकीची किंवा अनावश्यक भीती निर्माण झाली. कंपनीने हेही स्पष्ट केले आहे की संबंधित विमान डीजीसीएच्या नियमांनुसार प्रमाणित असून त्याचे संचालन वैध पद्धतीने केले जात होते.

पोस्ट हटवण्याचीही मागणी  (Nora Fatehi)

ड्यून्स एव्हिएशनने केवळ आर्थिक नुकसानभरपाईची मागणी केलेली नाही. नोराने सोशल मीडिया अकाउंटवर शेअर केलेल्या संबंधित पोस्ट हटवाव्यात, अशी मागणीही कंपनीने केली आहे. तसंच, नोराने सार्वजनिकपणे स्पष्टीकरण द्यावे आणि कंपनीच्या प्रतिमेला झालेल्या नुकसानीबद्दल माफी मागावी, अशी मागणी याचिकेत करण्यात आली आहे.

आता कोर्टाच्या निर्णयाकडे लक्ष    (Nora Fatehi)

दरम्यान, या प्रकरणात नोराची बाजू काय आहे आणि तिने कंपनीच्या दाव्याला काय उत्तर दिले आहे, याबाबतची माहिती या वृत्तात स्पष्ट करण्यात आलेली नाही. त्यामुळे आता २५ सप्टेंबर रोजी न्यायालयात होणाऱ्या सुनावणीकडे सर्वांचे लक्ष लागले आहे.

सेलिब्रिटींकडून सोशल मीडियावर केलेल्या प्रत्येक वक्तव्याचा मोठा परिणाम होऊ शकतो, हे या प्रकरणातून पुन्हा एकदा समोर आले आहे. एखाद्या गोष्टीवर केलेली साधी टिप्पणीही कधी कधी व्यावसायिक वादाचे रूप घेऊ शकते आणि थेट न्यायालयापर्यंत पोहोचू शकते.