Phaltan: शेअर मार्केट ट्रेडिंगमध्ये मोठ्या नफ्याचे आमिष दाखवून फलटण येथील ज्वेलर्स अर्थ मनीष गांधी यांची ४२ लाख रुपयांची ऑनलाइन फसवूणक करण्यात आली आहे.
अर्थ मनिष गांधी (वय २५, रा. रविवार पेठ फलटण) यांना संशयितांनी फोनद्वारे व व्हॉटसॲपद्वारे संपर्क साधून शेअर मार्केट ट्रेडिंगचा अनुभव असल्याचे सांगितले. तसेच एम. टी. एफ. व शेअर मार्केटमध्ये गुंतवूणक केल्यास मोठया प्रमाणात नफा मिळवून देण्याचे आमिष दाखवून गांधी यांचा विश्वास संपादन केला.

त्यांनतर संशयितांनी गांधी यांना विविध ट्रेडिंग अकाऊंट व बँक खात्यामध्ये रक्कम जमा करण्यास सांगितले. संशयितांच्या सांगण्यावरून गांधी यांनी वेगेवगेळ्या बँक खात्यांमध्ये व यु. पी. आयद्वारे एकुण ४२ लाख रुपये रक्कम पाठविली. गांधी यांच्या ट्रेडिंग अकाऊंटमध्ये नफा झाल्याचे भासवून संशयितांनी आणखी रक्कम भरण्यास प्रवृत्त केले. त्यांनतर रक्कम परत मागितल्यावर विविध कारणे सांगून रक्कम परत केली नाही. तसेच मार्जिन भरणे व ट्रेडिंग पोझिशन्स रिलीज करण्याच्या नावाखाली आणखी पैशाची मागणी करण्यात आली.

याप्रकारे संशयितांनी संगनमताने गांधी यांचा विश्‍वास संपादन करून खोटी माहिती व मोठ्या नफ्याचे आमिष दाखवून एकूण ४२ लाख रुपयांची ऑनलाइन आर्थिक फसवणूक केल्याचे निष्पन्न झाले आहे. या गुन्हयातील संशयितांनी वापरलेले मोबाइल क्रमांक, बँक खाते क्रमांक, युपीआय व्यवहार व संबंधित अर्थिक व्यवहार याबाबत तपास सुरू आहे. तसेच फसवणुकीची रक्कम ज्या खात्यांमध्ये वर्ग झाली आहे. त्या खात्याचा व संबंधित संशयितांचा शोध घेण्यात येत असून नागरिकांनी अनोळखी व्यक्तीच्या सांगण्यावरुन शेअर मार्केट ट्रेडिंग, ऑनलाइन गुंतवणूक किंवा मोठया नफ्याचे आमिष दाखविणाऱ्या या व्यक्तींवर विश्‍वास ठेवू नये, कोणत्याही अनोळखी व्यक्तीस ओटीपी पीन पासवर्ड, आधार कार्ड, पॅनकार्ड बँक खात्याची माहिती किंवा वैयक्तिक कागदपत्रे देऊ नयेत. ऑनलाइन आर्थिक फसवणूक झाल्यास नागरिकांनी तात्काळ सायबर हेल्पलाईन १९३० वर संपर्क साधावा व संबंधित पोलीस ठाण्यात तक्रार द्यावी, असे आवाहन पोलीस निरीक्षक घनशाम बल्लाळ यांनी केले आहे.