School Timing : बुलढाणा जिल्ह्यात वाढत्या उष्णतेच्या पार्श्वभूमीवर जिल्हा परिषद शाळांच्या वेळेत बदल करण्यात आला आहे. विद्यार्थ्यांच्या आरोग्याचा विचार करून जिल्हा परिषदेच्या मुख्य कार्यकारी अधिकाऱ्यांनी शाळा आता सकाळच्या सत्रात घेण्याचे आदेश जारी केले आहेत. मार्च महिन्याच्या दुसऱ्याच आठवड्यात विदर्भासह राज्यातील अनेक भागांमध्ये तापमानात मोठी वाढ झाली आहे. या पार्श्वभूमीवर विद्यार्थ्यांना उन्हाचा त्रास होऊ नये यासाठी जिल्हा परिषद शाळा सकाळी 7 ते 11.30 या वेळेत भरवण्याचा निर्णय घेण्यात आला आहे. तसेच शाळांमध्ये विद्यार्थ्यांसाठी पुरेशा पिण्याच्या पाण्याची व्यवस्था ठेवण्याच्या सूचनाही देण्यात आल्या आहेत. विदर्भात उन्हाचा पारा झपाट्याने वाढत असून बुलढाणा जिल्ह्यात तापमान 39 अंश सेल्सिअसपर्यंत पोहोचले आहे. त्यामुळे शाळेच्या वेळेत बदल करण्याचा निर्णय प्रशासनाने घेतला आहे. दरम्यान परभणी जिल्ह्यातही उष्णतेची तीव्रता वाढली असून कमाल तापमान 38.04 अंश सेल्सिअस नोंदवले गेले आहे. उकाड्यामुळे दुपारच्या वेळेत रस्त्यांवरील वर्दळ कमी झाल्याचे चित्र दिसत आहे. नागरिक सावलीचा आसरा घेताना दिसत आहेत. तर अकोला जिल्ह्यात उन्हाचा कडाका अधिकच वाढला असून तापमान 41 अंश सेल्सिअसवर पोहोचले आहे. उष्णतेपासून बचाव करण्यासाठी शहरातील काही ठिकाणी ग्रीन नेटचे मंडप उभारण्यात आले आहेत. विशेषतः न्यू तापडियानगर परिसरातील रेल्वे क्रॉसिंगवर नागरिकांना उन्हापासून दिलासा देण्यासाठी ही व्यवस्था करण्यात आली आहे. हवामान तज्ज्ञांच्या मते, मार्चच्या सुरुवातीलाच तापमान वाढल्याने येत्या काही दिवसांत उष्णतेची लाट अधिक तीव्र होण्याची शक्यता आहे. त्यामुळे नागरिकांनी दुपारच्या वेळेत बाहेर पडणे टाळावे आणि उष्णतेपासून बचावासाठी आवश्यक काळजी घ्यावी, असे आवाहन करण्यात येत आहे.
