ओझर: येडगाव परीसरात राहणाऱ्या दोघांकडून एक पिस्तुल व २ जिवंत काडतुसे, १ एअरगन, २ कोयते, स्वीफ्ट गाडी असा एकुण ५ लाख २७ हजार १०० रू किंमतीचे मुद्येमाल जप्त केला असल्याची माहिती नारायणगाव पोलीस स्टेशनचे सहाय्यक पोलीस निरीक्षक महादेव शेलार यांनी दिली.

सार्थक जयसिंग नेहरकर व राजु अजितसिंग रजपुत दोन्ही रा. येडगाव ता जुन्नर जि पुणे असे पोलिसांनी ताब्यात घेतलेल्या इसमांची नावे असून नारायणगाव पोलीस स्टेशनचे प्रभारी अधिकारी महादेव शेलार यांना दिनांक ८ ऑगस्ट रोजी सार्थक नेहरकर राहणार येडगाव याच्याकडे गावठी पिस्टल असल्याची गोपनीय माहिती मिळाली.

त्यांनी पोसई जगदेवप्पा पाटील, पोलीस हवालदार लोखंडे, पोलीस काॅन्स्टेबल गोविंद केंद्रे, सत्यम केळकर, सोमनाथ डोके,  रघतवान, गेंगजे, जाधव, चौगुले यांची टीम तयार करून सार्थक नेहरकर रा. येडगाव याचा शोध घेवुन त्यास ताब्यात घेऊन चौकशी केली.

या चौकशीत त्याने राजु रजपुत याचे स्वीफ्ट गाडी क्र. एम एच १४ डी ए ४७६६ मध्ये एक पिस्तुल व दोन जिवंत काडतुसे, एक एअरगन, दोन कोयते व मोटारसायकलच्या चैनस्पाॅकेटच्या व लोखंडी सळईच्या सहायाने बनवलेले हत्यार असे हत्यारे ठेवले आहेत अशी माहिती दिली. पो स ई पाटील व टिमने राजु रजपुत याच्या ताब्यात असलेल्या स्विफ्ट गाडीसह ताब्यात घेवुन पाहणी केली.

त्यावेळी स्विफ्टमध्ये सदर हत्यारे मिळुन आले. त्यावेळी हजर असलेल्या पंचासमक्ष सदरचा मुद्येमाल जप्त करून सदर गुन्ह्यातील आरोपींना ताब्यात घेऊन प्रथमवर्ग न्यायदंडाधिकारी केार्ट जुन्नर यांचे समक्ष हजर करण्यात आले. त्यांना ४ दिवस पोलीस कोठडी मंजुर केली आहे.

सदरची कारवाई पुणे ग्रामीणचे पोलीस अधिक्षक संदीप सिंह गिल्ल, अपर पोलीस अधिक्षक रमेश चोपडे, उपविभागीय पोलीस अधिकारी जुन्नर विभाग, धनंजय पाटील जुन्नर यांचे मार्गदर्शनाखाली सहाय्यक पोलीस निरीक्षक महादेव शेलार, पोलीस उपनिरीक्षक जगदीश पाटील, पोलीस हवलदार मंगेश लोखंडे, पोलीस शिपाई गोविंद केंद्रे, सत्यम केळकर, सोमनाथ डोके, महिला पोलीस शिपाई सोनाली रघतवान, कविता गेंगजे, पोलीस नीलेश जाधव तसेच स्थानीक गुन्हे शाखेचे सहा. फौजदार दिपक साबळे, पोलीस हवालदार संदीप वारे, पोलीस शिपाई अक्षय नवले यांनी केली आहे.