मुंबई – राष्ट्रवादी कॉंग्रेसचे नेते अजित पवार यांच्या गटातील 12 आमदारांना शरद पवार गटाकडून कारणे दाखवा नोटीस पाठवण्यात आली आहेत. तसेच आमदारांना उत्तर देण्यासाठी 48 तासांचा अवधी देण्यात आला आहे. शरद पवार यांनी 5 जुलै रोजी यशवंतराव चव्हाण प्रतिष्ठान येथे पक्षाची बैठक बोलावली होती. या बैठकीला मंत्रिपदाची शपथ घेतलेले 9 आमदार वगळून सर्व आमदारांना निमंत्रित करण्यात आले होते. परंतु त्याच दिवशी अजित पवार यांनीही वांद्रे येथील एमआयटी येथे बैठक बोलवली होती. त्या बैठकीला राष्ट्रवादीचे काही आमदार गेले होते. मात्र, शरद पवारांनी बोलवलेल्या बैठकीत गैरहजर राहून पक्षविरोधी कारवाई केल्याप्रकरणी 12 आमदारांना नोटीस पाठवण्यात आली आहे. यात सुनील शेळके, दिलीप बनकर, नितीन पवार, दीपक चव्हाण, इंद्रनील नाईक, यशवंत माने, शेखर निकम, राजू कारेमोरे, मनोहर चंद्रकपुरे, संग्राम जगताप, राजेश पाटील आणि माणिकराव कोकाटे या 12 आमदारांना शरद पवार गटातून नोटीस पाठवण्यात आली आहे.
