Ramayana Box Office Collection Day 16: KGF 2 चा विक्रम मोडत ‘रामायण’ची बॉक्स ऑफिसवर धडाकेबाज कमाई; १५ दिवसांत जगभरातून १,५४७ कोटींचा गल्ला!
Ramayana Box Office Collection Day 16 ‘रामायण’ने आतापर्यंत अनेक मोठ्या चित्रपटांना कमाईच्या बाबतीत मागे टाकले आहे. रणवीर सिंहच्या ‘धुरंधर’ आणि विक्की कौशलच्या ‘छावा’ या चित्रपटांच्या कमाईचे आकडेही या चित्रपटाने मागे टाकल्याचा दावा केला जात आहे. आता चित्रपटाची तुलना ‘बाहुबली २ : द कन्क्लूजन’, ‘दंगल’, ‘पुष्पा २ : द रूल’ आणि ‘धुरंधर द रिव्हेंज’ यांसारख्या मोठ्या चित्रपटांच्या जागतिक कमाईशी केली जात आहे.

Ramayana Box Office Collection Day 16: बॉक्स ऑफिसवर सध्या रणबीर कपूर आणि यश यांच्या ‘रामायण पार्ट १’ या चित्रपटाची जोरदार चर्चा सुरू आहे. प्रदर्शनाच्या पहिल्याच दिवसापासून प्रेक्षकांचे लक्ष वेधून घेणाऱ्या या चित्रपटाने आता कमाईच्या बाबतीत नवा इतिहास रचला आहे. अवघ्या १५ दिवसांत चित्रपटाने यशच्या ‘केजीएफ चॅप्टर २’ या सुपरहिट चित्रपटाचा भारतातील लाइफटाइम नेट कलेक्शनचा विक्रम मोडला आहे. विशेष म्हणजे, जगभरातील कमाईचा आकडा १,५४७ कोटी रुपयांच्या पुढे गेला आहे. त्यामुळे आगामी काळात हा चित्रपट आणखी कोणते विक्रम आपल्या नावावर करणार, याकडे सर्वांचे लक्ष लागले आहे.
‘रामायण’ने मोडला ‘केजीएफ २’चा विक्रम
दिग्दर्शक नितेश तिवारी यांनी ‘रामायण पार्ट १’चे दिग्दर्शन केले आहे. या चित्रपटात रणबीर कपूरने प्रभू श्रीरामांची, तर साई पल्लवीने माता सीतेची भूमिका साकारली आहे. अभिनेता यश लंकापती रावणाच्या भूमिकेत दिसत आहे. चित्रपटाला सुरुवातीला संमिश्र प्रतिक्रिया मिळाल्या होत्या. मात्र, त्यानंतर प्रेक्षकांचा चांगला प्रतिसाद मिळाल्याने चित्रपटाच्या कमाईत सातत्याने वाढ होत गेली.
आतापर्यंत ‘रामायण’ने भारतीय बॉक्स ऑफिसवर ८६३.७५ कोटी रुपयांचे नेट कलेक्शन केले आहे. दुसरीकडे, यशच्या ‘केजीएफ चॅप्टर २’ या चित्रपटाचे भारतातील लाइफटाइम नेट कलेक्शन ८५९.७० कोटी रुपये होते. मात्र, ‘रामायण’ने हा आकडा मागे टाकत सुमारे चार कोटी रुपयांची अधिक कमाई केली आहे. त्यामुळे भारतीय बॉक्स ऑफिसवर या चित्रपटाने नवा विक्रम प्रस्थापित केला आहे.

Ramayana Box Office Collection Day 16
हिंदी भाषेतून सर्वाधिक कमाई
‘रामायण’ चित्रपटाला हिंदी भाषिक प्रेक्षकांकडून सर्वाधिक प्रतिसाद मिळत आहे. प्रदर्शनाच्या १५व्या दिवशी चित्रपटाने सर्व भाषांमध्ये मिळून १९.३५ कोटी रुपयांची कमाई केली. यामध्ये हिंदी भाषेतील कमाई सर्वाधिक आहे.
१५व्या दिवसाच्या भाषानिहाय कमाईचा विचार केला तर हिंदी आवृत्तीतून १४ कोटी रुपये मिळाले आहेत. मल्याळम भाषेतून १.७५ कोटी, तमिळ भाषेतून १.५० कोटी, कन्नड भाषेतून १.४० कोटी, तर तेलुगू भाषेतून ७० लाख रुपयांची कमाई झाली आहे. देशभरात तब्बल २१,४३७ शोमध्ये हा चित्रपट दाखवला जात आहे.
जगभरातील कमाई १,५४७ कोटींच्या पार
भारतातील कमाईसोबतच परदेशातही ‘रामायण’ला चांगला प्रतिसाद मिळत आहे. चित्रपटाने भारतात आतापर्यंत १,०३२.१५ कोटी रुपयांचे ग्रॉस कलेक्शन केले आहे. तर परदेशातील बाजारपेठेतून ५१५ कोटी रुपयांची कमाई केली आहे. त्यामुळे चित्रपटाचे जगभरातील एकूण ग्रॉस कलेक्शन १,५४७.१५ कोटी रुपयांच्या पुढे गेले आहे.
विशेष म्हणजे, प्रदर्शनाच्या पहिल्या आठवड्यात चित्रपटाने भारतात ५६४.५० कोटी रुपयांचे नेट कलेक्शन केले होते. त्यानंतर दुसऱ्या आठवड्यातही चित्रपटाची कमाई कायम राहिली. दुसऱ्या शुक्रवारी ४८.१० कोटी, शनिवारी ७२.९० कोटी आणि रविवारी ७५ कोटी रुपयांची कमाई झाली. त्यानंतर सोमवारपासून कमाईत काहीशी घट झाली. सोमवारी ३२ कोटी, मंगळवारी २८.६० कोटी, बुधवारी २३.२० कोटी आणि गुरुवारी १९.३५ कोटी रुपयांचा गल्ला चित्रपटाने जमवला.
आता २ हजार कोटींच्या कमाईकडे लक्ष
‘रामायण’ने आतापर्यंत अनेक मोठ्या चित्रपटांना कमाईच्या बाबतीत मागे टाकले आहे. रणवीर सिंहच्या ‘धुरंधर’ आणि विक्की कौशलच्या ‘छावा’ या चित्रपटांच्या कमाईचे आकडेही या चित्रपटाने मागे टाकल्याचा दावा केला जात आहे. आता चित्रपटाची तुलना ‘बाहुबली २ : द कन्क्लूजन’, ‘दंगल’, ‘पुष्पा २ : द रूल’ आणि ‘धुरंधर द रिव्हेंज’ यांसारख्या मोठ्या चित्रपटांच्या जागतिक कमाईशी केली जात आहे.
जगभरातील १,५४७ कोटींचा टप्पा पार केल्यानंतर आता ‘रामायण’ २ हजार कोटींचा आकडा गाठणार का, हा सर्वांसाठी उत्सुकतेचा विषय ठरला आहे. आगामी दिवसांत चित्रपटाची कमाई कशी राहते, यावर त्याच्या पुढील विक्रमांचे गणित अवलंबून असेल.





