Box Office Collection: गुरुवारी बॉक्स ऑफिसवर सर्वच चित्रपटांच्या कमाईत घसरण दिसून आली. मात्र ‘महावतार नरसिंह’ने दमदार कामगिरी करत ‘सैयारा’च्या कमाईला ब्रेक लावला. दुसरीकडे, ‘सन ऑफ सरदार 2’ आणि ‘धडक 2’ या दोन्ही चित्रपटांच्या कमाईतही घट झाली आहे.

अश्विन कुमार दिग्दर्शित अ‍ॅनिमेशनपट ‘महावतार नरसिंह’ने सुरुवातीला संथ कमाई केली असली तरी नंतर जोरदार गती पकडली आहे. गुरुवारी या चित्रपटाने 5.25 कोटी रुपये कमावले. बुधवारी हा आकडा 6 कोटी रुपये होता. आतापर्यंत 14 दिवसांत ‘महावतार नरसिंह’ने एकूण 118.05 कोटी रुपये कमावले आहेत. विशेष म्हणजे या चित्रपटाचा अंदाजित बजेट फक्त 4 कोटी रुपये इतका आहे.

सैयारा

मोहित सूरी दिग्दर्शित आणि अहान पांडे, अनीत पड्डा अभिनीत ‘सैयारा’ने 21 दिवस बॉक्स ऑफिसवर वर्चस्व गाजवले. मात्र आता या चित्रपटाच्या कमाईतही घसरण दिसत आहे. गुरुवारी या चित्रपटाने 1.85 कोटी रुपये, तर बुधवारी 2 कोटी रुपये कमावले. या घसरणीनंतरही एकूण कमाई 308.45 कोटी रुपये झाली आहे.

सन ऑफ सरदार 2

अजय देवगणचा हा चित्रपट सातव्या दिवशी केवळ 1.40 कोटी रुपये कमवू शकला. बुधवारी हा आकडा 1.64 कोटी रुपये होता. एकूण कमाईचा विचार करता, ‘सन ऑफ सरदार 2’ने आतापर्यंत 32.89 कोटी रुपये कमावले आहेत.

धडक 2

सिद्धांत चतुर्वेदी आणि तृप्ती डिमरी अभिनीत ‘धडक 2’ने गुरुवारी केवळ 1 कोटी रुपये कमावले. बुधवारी चित्रपटाने 1.04 कोटी रुपये कमावले होते. एकूण 7 दिवसांत या चित्रपटाची कमाई 16.44 कोटी रुपये इतकी झाली आहे. या चित्रपटाचं दिग्दर्शन शाजिया इक्बाल यांनी केलं आहे.

किंगडम

दक्षिणात्य अभिनेता विजय देवरकोंडा याचा ‘किंगडम’ चित्रपट आठव्या दिवशी 1.25 कोटी रुपये कमवत आहे. बुधवारी हा आकडा 1.5 कोटी रुपये होता. एकूण आठ दिवसांत चित्रपटाने 47.40 कोटी रुपये कमावले आहेत.

सध्या बॉक्स ऑफिसवर ‘महावतार नरसिंह’चीच कमाल आहे. कमी बजेटमध्येही या अ‍ॅनिमेशनपटाने इतर मोठ्या स्टार्सच्या चित्रपटांना मागे टाकले आहे. ‘सैयारा’ची कमाई आता थोडी कमी होत असली तरी ती अजूनही चांगल्या पातळीवर आहे. ‘सन ऑफ सरदार 2’, ‘धडक 2’ आणि ‘किंगडम’साठी मात्र परिस्थिती चिंताजनक आहे.