Pratap Sarnaik : राष्ट्रवादी काँग्रेस शरद पवार गटाचे आमदार रोहित पवार यांनी राज्याचे कृषीमंत्री माणिकराव कोकाटे यांचा सभागृहात मोबाईलवर रेमी खेळत असल्याचा दावा करत व्हिडीओ शेअर केला आहे. या व्हिडीओमुळे मोठी खळबळ उडाली असून, राजकीय वातावरण चांगलेच तापल्याचे पाहायला मिळत आहे. कोकाटेंवर चहुबाजूंनी टीकेचा भडिमार करण्यात येत आहे. अशातच शिवसेनेचे आमदार आणि राज्याचे परिवहन मंत्री प्रताप सरनाईक यांनी कोकाटेंचे पाठराखण करणारे विधान केले असल्याची चर्चा आहे.

अभिनेता आमिर खान, सलमान खान सध्या सगळेच रमी खेळतात. टीव्हीवर दाखवलं जातं, असे विधान प्रताप सरनाईक यांनी केले आहे. विधिमंडळात कृषिमंत्री माणिकराव कोकाटे रमी खेळत असल्याचा व्हिडीओ राष्ट्रवादी काँग्रेस शरद पवार पक्षाचे आमदार रोहित पवार यांनी पोस्ट केला होता. यावर प्रतिक्रिया देताना प्रताप सरनाईक यांनी माणिकराव कोकाटे यांचा समर्थन दर्शविणारी प्रतिक्रिया दिली असल्याची चर्चा सुरू झाली आहे.

संजय राऊतांचा मोठा दावा

संजय राऊत यांनी कोकाटे यांच मंत्रिपद जाणार असल्याचा मोठा दावा केला आहे. तसेच अमित शाह यांनी राज्यातील सहा ते सात जणांना मंत्रिपदापासून वगळण्याच्या सूचना मुख्यमंत्र्यांना केला असल्याचे देखील राऊत म्हणाले आहेत. यामुळे राज्याच्या राजकारणात मोठी खळबळ उडाली आहे.

सुषमा अंधारेंची टीका 

“महाराष्ट्राच्या मंत्रिमंडळाची अवस्था झाली ही येड्याची जत्रा आणि पेढ्यांचा पाऊस अशी झाली आहे. कधी एखादा सत्ताधाऱ्यांचा आमदार बनियानवर खाली उतरून कँन्टिन वाल्यांना मारहाण करतो. विधीमंडळाच्या प्रांगणात गँगवारसारखी भांडणं होतात. कधी एखादा मंत्री करोडो रूपये मोजतानाचा व्हिडीओ व्हायरल होतो. तर आता तर हद्द विधीमंडळाच्या सभागृहामध्ये कृषीमंत्री रम्मी गेम खेळताना दिसतात,” असं सुषमा अंधारे म्हणाल्या.

कोकाटेंचे स्पष्टीकरण 

मी कोणाला तरी दाखवत असेल अशा प्रकारची रमीची जाहिरात येते मोबाईलवर, ती किती चूकची आहे, त्याच्यामुळे किती लोकांवर परिणाम होतो असे शेजारी बसलेल्यांना सांगत असेल, असे स्पष्टीकरण त्यांनी दिले आहे. मी सभागृहात एकदम सिरीयसली उत्तर देतो अन् बसतो, असेही ते म्हणाले आहेत. तर लवकरच याबद्दल खुलासा करेन असे देखील सांगितले. ही  प्रतिक्रिया त्यांनी झी २४ तास या वाहिनीसोबत बोलताना दिली आहे.

हेही वाचा : “राहुल गांधींना पाकिस्तानची जास्त चिंता” ; उपमुख्यमंत्री केशव प्रसाद मौर्य यांची टीका, नेमकं असं का म्हणाले ?