Pooja Hegde: तमिळनाडू विधानसभा निवडणुकीच्या निकालानंतर अभिनेता थलपती विजय सध्या प्रचंड चर्चेत आहे. त्यांच्या पक्षाने दमदार कामगिरी करत मोठा विजय मिळवला आहे. या विजयानंतर आता अभिनेत्री पूजा हेगडे हिचा एक जुना व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमुळे पूजा हेगडेने आधीच विजयच्या विजयाची भविष्यवाणी केली होती, अशी चर्चा रंगली आहे.

हा व्हिडिओ ‘जन नायकन’ या आगामी चित्रपटाच्या शूटिंगदरम्यानचा असल्याचे सांगितले जाते. या व्हिडिओमध्ये पूजा एका व्हाइटबोर्डकडे इशारा करते. त्या बोर्डवर “निवडणूक कोण जिंकेल?” असे लिहिलेले दिसते. त्यानंतर पूजा हसत विजयकडे बोट दाखवते. हे पाहून विजय लाजत आपला चेहरा झाकतात. हा हलकाफुलका क्षण आता खूपच चर्चेत आला आहे.

पूजाने हा व्हिडिओ स्वतःच्या इन्स्टाग्राम अकाउंटवर शेअर करत लिहिले की, “कदाचित हे होण्याआधीच मी याचा अंदाज लावला होता. स्वप्नांना वास्तवात बदलण्याचे नाव म्हणजे विजय सर.” या कॅप्शनमुळे चाहत्यांमध्ये अधिकच उत्सुकता वाढली आहे. अनेक यूजर्स तिच्या पोस्टवर कमेंट करत आहेत की तिचा अंदाज अगदी बरोबर ठरला. काही जण मजेत असेही म्हणत आहेत की, “आता पूजा हेगडे मुख्यमंत्री विजयसोबत दिसणार!”

 

View this post on Instagram

 

A post shared by Pooja Hegde (@hegdepooja)

तमिळनाडूतील या निवडणुकीत विजय यांच्या पक्षाने २३४ पैकी १०८ जागांवर विजय मिळवला. हा निकाल त्यांच्या राजकीय कारकिर्दीसाठी महत्त्वाचा टप्पा मानला जात आहे. सिनेमा क्षेत्रातून राजकारणात आलेल्या विजयने कमी वेळात मोठी लोकप्रियता मिळवली आहे. त्यामुळे त्यांच्या विजयाकडे सगळ्यांचे लक्ष लागले होते.

दरम्यान, विजयच्या या यशानंतर अनेक चित्रपट कलाकारांनी त्यांचे अभिनंदन केले आहे. पूजा हेगडेनेही वेगळ्या पद्धतीने शुभेच्छा देत हा व्हिडिओ शेअर केला. त्यामुळे हा व्हिडिओ सोशल मीडियावर ट्रेंड होत आहे.

‘जन नायकन’ या चित्रपटाबद्दल बोलायचे झाल्यास, या चित्रपटात पूजा आणि विजय एकत्र दिसणार आहेत. हा चित्रपट ८ मे रोजी चित्रपटगृहात प्रदर्शित होणार आहे. चाहत्यांमध्ये या चित्रपटाबद्दलही मोठी उत्सुकता आहे.

एकूणच, विजयच्या राजकीय यशासोबतच पूजाच्या या व्हिडिओमुळे मनोरंजन आणि राजकारण यांचा एक वेगळाच संगम पाहायला मिळत आहे.