FD Interest Rate: बँकेत सुरक्षित गुंतवणूक करून चांगले व्याज मिळवू इच्छिणाऱ्यांसाठी महत्त्वाची बातमी आहे. सार्वजनिक क्षेत्रातील बँक ऑफ इंडियाने (BOI) 500 दिवसांची विशेष मुदत ठेव योजना सुरू केली आहे. या योजनेचे नाव ‘बीओआय अक्षय फिक्स्ड डिपॉझिट’ असे आहे. या योजनेत सामान्य नागरिकांसह ज्येष्ठ आणि अतिज्येष्ठ नागरिकांना वेगवेगळ्या व्याजदरांचा लाभ मिळणार आहे. विशेष म्हणजे, 80 वर्षे किंवा त्यापेक्षा जास्त वयाच्या नागरिकांना सर्वाधिक 7.50 टक्के व्याज दिले जाणार आहे.

कोणाला किती व्याज मिळणार?

बँक ऑफ इंडियाच्या या विशेष एफडी योजनेत सामान्य नागरिकांना वार्षिक 6.85 टक्के व्याज मिळेल. 60 ते 80 वर्षांपेक्षा कमी वयाच्या ज्येष्ठ नागरिकांना 7.35 टक्के, तर 80 वर्षे आणि त्यापुढील वयाच्या अतिज्येष्ठ नागरिकांना 7.50 टक्के व्याजदर मिळणार आहे.

10 लाखांच्या गुंतवणुकीवर किती मिळणार?

या योजनेत 10 लाख रुपये गुंतवल्यास 500 दिवसांनंतर किती रक्कम मिळेल, याचे गणित समजून घेऊया.

– 60 वर्षांपेक्षा कमी वय: 6.85 टक्के व्याजदरानुसार 93,836 रुपये व्याज मिळेल. मुदतपूर्तीनंतर एकूण 10,93,836 रुपये मिळतील.

– 60 ते 80 वर्षांपेक्षा कमी वय: 7.35 टक्के व्याजदरानुसार 1,00,685 रुपये व्याज मिळेल. मुदतपूर्तीनंतर एकूण 11,00,685 रुपये मिळतील.

– 80 वर्षे किंवा त्यापुढील वय:7.50 टक्के व्याजदरानुसार 1,02,740 रुपये व्याज मिळेल. मुदतपूर्तीनंतर एकूण 11,02,740 रुपये मिळतील.

एफडीच्या व्याजावरही कर लागू

या योजनेतून मिळणारे व्याज करपात्र आहे. त्यामुळे गुंतवणूकदारांना मिळणाऱ्या व्याजावर त्यांच्या लागू असलेल्या आयकर नियमांनुसार कर भरावा लागू शकतो. त्यामुळे एफडीमध्ये पैसे गुंतवण्यापूर्वी व्याजदर, कर आणि इतर अटी तपासणे महत्त्वाचे आहे.

ही योजना मर्यादित कालावधीसाठी उपलब्ध असल्याचे सांगण्यात आले आहे. त्यामुळे गुंतवणूक करण्यापूर्वी बँक ऑफ इंडियाच्या अधिकृत संकेतस्थळावर किंवा जवळच्या शाखेत योजनेची उपलब्धता आणि सविस्तर अटी तपासाव्यात.