नवी दिल्ली – भारतीय जनता पक्षाने 2024 ची निवडणूक कॉल सेंटरच्या माध्यमातून जिंकण्याची रणनीती आखली आहे. यासाठी भाजप देशभरात मोठ्या प्रमाणात कॉल सेंटर उघडणार आहे. या माध्यमातून मोदी सरकार आणि भाजपसाठी राजकीय मैदान तयार करण्यासाठी 20 हजार तरुणांची फौज रात्रंदिवस काम करणार आहे. कॉल सेंटर सुरू करण्यासंदर्भात, भाजपने पक्षाच्या मुख्यालयात एक महत्त्वाची बैठक बोलावली आहे, ज्यामध्ये कॉल सेंटरद्वारे निवडणूक प्रचार मॉडेलची रूपरेषा मांडली जाईल. भाजप 225 कॉल सेंटर उघडणार भाजपच्या सूत्रांचे म्हणणे आहे की, पक्षाने २०२४ च्या लोकसभा निवडणुकीसाठी २२५ हून अधिक कॉल सेंटर्स उघडण्याची तयारी केली आहे. कॉल सेंटरबाबत शुक्रवारी होणाऱ्या बैठकीत गृहमंत्री अमित शाह देशाच्या कानाकोपऱ्यातून येणाऱ्या पक्षाच्या कॉल सेंटर समन्वयकांना मार्गदर्शन करणार आहेत. अमित शहा यांच्या भाषणाने या बैठकीची सुरुवात होईल. यानंतर देशभरातील कॉल सेंटर समन्वयकांच्या बैठकीत भाजप अध्यक्ष जेपी नड्डा आणि संघटन मंत्री बीएल संतोष लोकसभा निवडणुकीच्या प्रचाराची रूपरेषाही मांडणार आहेत. ही बैठक अधिकृतपणे 2024 च्या लोकसभा निवडणुकीच्या तयारीची सुरुवात मानली जात आहे. कॉल सेंटर सुरू करण्यासाठी पहिली बैठक शुक्रवारी बोलावण्यात आली असली, तरी पक्षाच्या रणनीतीकारांनी आतापासूनच तयारी सुरू केली होती. 2024 च्या लोकसभेसाठी एकूण किती कॉल सेंटर उघडायचे हे सप्टेंबर महिन्यातच ठरवले जाईल, असे भाजपच्या सूत्रांचे म्हणणे आहे. तसेच कॉल सेंटरमध्ये किती मनुष्यबळ लागेल आणि त्याचे प्रचाराचे मॉडेल काय असेल हेही ठरवले जाणार आहे. एवढेच नाही तर नोव्हेंबरच्या पहिल्या आठवड्यापर्यंत भाजपचे स्वतःचे कॉल सेंटर देशाच्या विविध भागांत काम करू लागतील. यावेळी भाजपने 2019 च्या निवडणुकीपेक्षा अधिक कॉल सेंटर्स उघडण्याची योजना आखली आहे. यावेळी भाजप आपल्या कॉल सेंटरची संख्या 225 पेक्षा जास्त करणार आहे. या कॉल सेंटरमध्ये सुमारे १८ ते २० हजार कॉलर्स २४ तास कार्यरत असतील. जार्विस ही भाजपच्या या सर्व कॉल सेंटरसाठी सॉफ्टवेअर आणि तांत्रिक सहाय्य देणारी कंपनी असेल. साधारणपणे भाजपचे कॉल सेंटर ही कंपनीच चालवते. 2019 च्या लोकसभा निवडणुकीतही याच कंपनीने भाजपसाठी काम केले. गेल्या वेळी भाजपने देशभरात 190 कॉल सेंटर उघडले होते आणि सुमारे 13000 कॉलर दिवसरात्र काम करत होते. प्रत्येक कॉल सेंटरवर सरासरी 70 ते 80 कॉलर कार्यरत होते, मात्र यावेळी कॉल सेंटरच्या संख्येबरोबरच कॉल करणाऱ्यांची संख्याही वाढली आहे. यापैकी 225 ठिकाणी कॉल सेंटर सुरू करण्यात येणार असून प्रत्येक कॉल सेंटरमध्ये 20-22 लोक तैनात करण्यात येत आहेत.
