जयपूर – आपआपसात भांडत बसणारे ज्येष्ठ नेते, पक्षाच्या धोरणातील समन्वयाचा अभाव आणि एकंदर अराजकसदृश परिस्थिती असे राजस्थानच्या जनतेने गेल्या साडेचार वर्षात जे काही पाहिले आणि जे काही भोगले, त्यावरून स्पष्टपणे त्यांच्या मनात असेच ठरले आहे की, प्रचंड बहुमताचे सरकार भाजपच्या नेतृत्वाखाली आले पाहिजे. राज्यात नऊ महिन्यांनंतर होणाऱ्या विधानसभा निवडणुकांनंतर राजस्थानमध्ये भाजप विक्रमी बहुमताने सरकार स्थापन करेल, असे प्रतिपादन भाजपचे राष्ट्रीय प्रवक्ते आणि राज्यसभा खासदार सुधांशू त्रिवेदी यांनी केले आहे.

कॉंग्रेसमध्ये सुरू असलेल्या गटबाजीबाबत सुधांशू त्रिवेदी म्हणाले की, राजस्थान हे असे राज्य आहे की, जिथे कॉंग्रेसने एक अप्रतिम उदाहरण मांडले आहे, ज्या नेत्याला राष्ट्रीय अध्यक्ष बनवले जात होते, तो नेता बंडखोर झाला आणि विशेष म्हणजे बंडखोरी या शिबिरात कॉंग्रेसचे प्रदेशाध्यक्ष गोविंद सिंग दोतासरा आणि सभापती सीपी जोशी हेही सहभागी झाले होते. इतकं अप्रतिम उदाहरण याआधी पाहिलं नाही.

आज राजस्थानची अवस्था अशी आहे की लोकांच्या भांडणाकडे लक्ष नाही, कॉंग्रेस हे असे जहाज आहे जे दोन पायलट वेगवेगळ्या दिशेने चालवत आहेत. एक फूल, दोन बागायतदार आणि दोघेही त्या फुलाचा नाश करण्यात मग्न आहेत, पण राजस्थानची जनता कमळाच्या फुलासोबत उभी आहे. वर्ष 2013 मध्ये केलेल्या विक्रमापेक्षा यावेळी भाजप चांगली कामगिरी करणार आहे, असेही त्रिवेदी शेवटी म्हणाले.