श्रीनग – 2019 च्या निवडणुकीनंतर त्यांनी आमच्या राज्यावर अन्याय केला. 370 कलम, ध्वज आमच्याकडून काढून घेण्यात आला. त्यांचे इरादे चांगले नाहीत. 2024 च्या निवडणुकीनंतर ते देशाची राज्यघटनाही रद्द करण्याच्या तयारीत आहेत. त्यांना भारत देशाला हिंदुत्ववादी आणि भाजपचे राष्ट्र बनवायचे आहे, असा आरोप जम्मू-काश्‍मीरच्या माजी मुख्यमंत्री आणि पीपल्स डेमोक्रॅटिक पक्षाच्या नेत्या मेहबुबा मुफ्ती यांनी केला.

त्या म्हणाल्या, भाजप सगळीकडे आमदार फोडून सरकार बनवत आहे. त्यांना सत्तेची लालसा आहे. सध्या ते जम्मू-काश्‍मीरमध्ये जे करत आहेत तेही त्याचाच भाग आहे. जम्मू-काश्‍मीर ही भाजपची प्रयोगशाळा आहे. काश्‍मीरमध्ये घडणाऱ्या घटनांची देशभर दखल घेतली जाते. त्याचमुळे भाजप काश्‍मीरमध्ये असे प्रयोग करत आहे.

जम्मू काश्‍मीरमध्ये विधानसभा निवडणूक होणार आहे. त्या पार्श्‍वभूमीवर राज्यात राहणारे काश्‍मिरी लोक विधानसभा निवडणुकीदरम्यान मतदार यादीत नाव नोंदवू शकतात. राज्यात तैनात असलेल्या सशस्त्र दलातील जवानांपासून ते अधिकाऱ्यांपर्यंत प्रत्येकजण मतदार यादीत नाव समाविष्ट करून मतदान करू शकणार आहे, असे निवडणूक आयोगाने म्हटले आहे. त्याचा संदर्भ घेत मुफ्ती यांनी हे विधान केले. आयोगाच्या या निर्णयावर मेहबूबा मुफ्ती यांनी निषेध नोंदवला आहे. पत्रकार परिषद घेत त्यांनी आपली निषेधाची भूमिका मांडली आहे.

दरम्यान, मेहबुबा मुफ्ती सध्या दुसऱ्या युगात जगत आहेत. त्यांचा पक्ष नॅशनल कॉन्फरन्स पक्षाचे दुकान आता बंद पडत चालले आहे. त्यांची दुकानदारी सध्या संपली आहे. म्हणून त्या असे बोलत आहेत. पीडीपी आणि नॅशनल कॉन्फरन्समध्ये पाकिस्तानी मतदारांचा समावेश होता, असा प्रतिहल्ला भाजपकडून करण्यात आला आहे.