Politics News : महाराष्ट्रातील ‘या’ भाजप आमदाराला 3 वर्षे कारावासाची शिक्षा; राजकीय वर्तुळात खळबळ
Politics News : उरणचे भाजप आमदार महेश बालदी यांच्यासह चार जणांना २०१० मधील मारहाण प्रकरणात अलिबाग न्यायालयाने तीन वर्षे सश्रम कारावासाची शिक्षा सुनावली. चारही आरोपींना जामीन मंजूर.

Politics News : उरणचे भाजप आमदार महेश बालदी यांच्यासह चार जणांना अलिबाग येथील मुख्य न्याय दंडाधिकारी न्यायालयाने तीन वर्षे सश्रम कारावासाची शिक्षा सुनावली आहे. २०१० मध्ये झालेल्या मारहाण प्रकरणात न्यायालयाने हा निकाल दिला.
मात्र, शिक्षा सुनावल्यानंतर चारही आरोपींना जामीन मंजूर करण्यात आला आहे. तसेच, या निकालाविरोधात वरिष्ठ न्यायालयात अपील करण्यासाठी एक महिन्याची मुदत देण्यात आली आहे.
नेमके प्रकरण काय?
हे प्रकरण रायगड जिल्ह्यातील उरणमधील असून, २०१० मधील आहे. एका मुलीची छेडछाड झाल्याची माहिती मिळाल्यानंतर आमदार महेश बालदी आणि त्यांचे काही सहकारी संबंधित तरुणाला जाब विचारण्यासाठी गेले होते.
त्यावेळी वाद होऊन तरुणाला मारहाण करण्यात आली. तसेच, त्याला शिवीगाळ करण्यात आली. या मारहाणीत तरुण गंभीर जखमी झाला होता. याप्रकरणी पोलिसांत गुन्हा दाखल करण्यात आला होता.
त्यानंतर अलिबाग न्यायालयात खटला सुरू होता. तब्बल १६ वर्षांनंतर न्यायालयाने चारही आरोपींना दोषी ठरवत तीन वर्षांच्या सश्रम कारावासाची शिक्षा सुनावली. जामीन आणि अपीलाची मुदत मिळाल्याने आरोपींना तातडीने तुरुंगात जावे लागणार नाही.





