तळेगाव ढमढेरे : जिल्ह्यातील राजकीयदृष्ट्या संवेदनशील असलेल्या तळेगाव ढमढेरे जिल्हा परिषद गटातील निवडणुकीच्या पार्श्वभूमीवर भाजपमध्ये राजकीय समीकरणे वेगाने बदलत आहेत. राजकीय नेत्यांची मांदियाळी असलेल्या तळेगावात झेडपी निवडणुकीत अस्तित्व आणि प्रतिष्ठतेचा प्रश्न निर्माण झाला आहे. राष्ट्रवादी कॉंग्रेसला तुल्यबळ लढत देण्यासाठी भाजपकडून रणनिती आखली जात आहे. त्यातच भाजपकडून दाेन प्रबळ उमेदवार हे आपल्या सौभाग्यवतींसाठी जीवाचे रान करीत आहेत. दोन प्रबळ उमेदवारांत कोण बाजी मारणार, याकडे लक्ष वेधले आहे. उमेदवारी वाटपात समझोता एक्स्प्रेस की बंडखोरी होणार काय, याची चर्चा तळेगाव गटात रंगली आहे. भाजप पदवीधर आघाडीचे जिल्हाध्यक्ष राहुल गव्हाणे मैदानात उतरल्याने तळेगाव ढमढेरे जिल्हा परिषद गटात रंगत आली आहे. एकीकडे तालुकाध्यक्ष जयेश शिंदे यांनी पत्नी रेश्मा शिंदे यांना मैदानात उतरून स्वतःची भक्कम मोर्चेबांधणी सुरू केली आहे. शिंदे यांच्या गटाची संघटनशक्ती आणि कार्यकर्त्यांवरील पकड लक्षात घेता, त्यांचा प्रभाव सहज दुर्लक्षित करता येणार नाही, असे स्थानिक राजकीय जाणकारांचे मत आहे. भाजपकडून जयेश शिंदे, राहुल गव्हाणे हे तळागाळात काम करीत असतात. त्यांचा जनसंपर्क ही दोघांसाठी जमेची बाजू आहे. शिंदे यांना शिरूर तालुक्याची कमांड मिळाल्याने त्यांचा फायदा होईल, अशी समर्थकांची भावना आहे. गव्हाणे यांचे राष्ट्रीय स्वयंसेवक संघाच्या माध्यमातून सेवा कार्य केले आहे. त्याचा लाभ त्यांना मिळू शकतो. हा अंदाज गटातून बांधला जात आहे. गट- गण आरक्षण जाहीर झाल्यानंतर तळेगावातील राजकीय समीकरणे बदलून गेली आहेत. त्यामुळे तळेगाव गटातून प्रबळ नेत्यांना आपल्या ‘सौ’ साठी देव पाण्यात ठेवावे लागले आहेत. गव्हाणे कुटुंबाला राजकीय वारसा राहुल गव्हाणे यांच्या पत्नी दीपाली गव्हाणे यांनी मतदारांसाठी उज्जैन यात्रेचे आयोजन करून सामाजिक संपर्क वाढविला आहे. या उपक्रमामुळे मतदारांमध्ये उत्सुकता निर्माण झाली आहे. दीपाली गव्हाणे या वडगाव शेरीचे आमदार बापूसाहेब पठारे यांच्या त्या लेक आहेत. त्यांना राजकीय वारसा आहे. गव्हाणे दाम्पत्याची राजकीय वलय त्यांना तारणार काय, याची चर्चा सुरू झाली आहे. गव्हाणे यांनी निवडणूक पूर्व वातावरण निर्मिती सुरू केली आहे. दरम्यान, भाजपकडून त्यांना उमेदवारीचे संकेत मिळाल्याची चर्चा रंगली आहे. तथापि, दुसऱ्या बाजूला जयेश शिंदे यांच्या नेतृत्वाखालील गट सक्रिय असून, तालुक्यातील जुन्या कार्यकर्त्यांचा पाठिंबा त्यांना मिळत असल्याचे बोलले जात आहे. शिंदे यांनी पक्ष संघटनात दीर्घकाळ काम केले असून, स्थानिक कार्यकर्त्यांशी मजबूत संबंध निर्माण केले आहेत. शासकीय योजना, जिल्हा परिषद गटात भरीव निधी आणण्यात ते यशस्वी ठरले आहेत. त्यामुळे आगामी निवडणुकीत भाजपकडून उमेदवार निश्चित करताना शिंदे यांच्या गटाचा विचार करणे गरजेचे आहे. शिंदे- गव्हाणे यांच्यात कोणाची सरशी? भाजपमध्ये सध्या गव्हाणे विरुद्ध शिंदे, अशी दोन प्रभावी समीकरणे उभी राहिल्याने तळेगाव ढमढेरे गटात राजकीय तणाव वाढला आहे. गव्हाणे दाम्पत्याच्या सामाजिक उपक्रमांना प्रतिसाद मिळत आहे. शिंदे यांच्या संघटनात्मक पकडीमुळे त्यांची भूमिका निर्णायक ठरणार आहे. तळेगाव ढमढेरे जिल्हा परिषद गटात भाजपची घरगुती लढत रंगण्याची चिन्हे दिसत आहे. जयेश शिंदे थांबणार नाहीत आणि त्यांचा मोर्चा अधिक आक्रमक होणार असल्याचे संकेत राजकीय वर्तुळातून मिळत आहेत. आगामी काही दिवसांत भाजपमधील ही अंतर्गत स्पर्धा असून ती कोणत्या वळणावर जाऊन ठेपणार, याकडे संपूर्ण गटाचे लक्ष लागले आहे. महाविकास आघाडीची भूमिका निर्णायक भाजपमध्ये प्रबळ, प्रस्थापित इच्छुक उमेदवार आहेत. त्याचबरोबर शरद पवार गट, अजित पवार गट, शिवसेना उद्धव बाळासाहेब ठाकरे यांच्या गटात महाविकास आघाडी की मैत्रीपूर्ण लढती होणार यावर अद्याप निर्णय झाला नाही. उमेदवारीचा घोळ मिटला नाही तर चौरंगी लढतीचे संकेत मिळत आहेत. तळेगाव गावात राजकीय नेत्यांचे वास्तव्य असल्याने या गावाला शिरूर तालुक्याला राजकीय वलय आहे.
